પોલીસને થાપ આપીને અનેકવાર પોલીસની જ નજર સમક્ષ ફરાર થઈ ગયેલા રાસિયાને ઝડપી પાડવા LCBએ ૧૫ દિવસ લાંબુ ‘ઓપરેશન ખોજ’ લૉન્ચ કર્યું હતું.

રેન્જ આઈજી ચિરાગ કોરડીયા અને એસપી વિકાસ સુંડાની સૂચના અને માર્ગદર્શન હેઠળ LCB પોલીસ ઈન્સ્પેક્ટર એ.એમ. મકવાણાએ એક ખાસ ટીમ બનાવીને રાસુભાના રહેઠાણ ખાનાય ગામ અને સીમના જંગલ વિસ્તારમાં વૉચ ગોઠવી હતી. કોઈને ગંધ ના આવે તે માટે પોલીસ કર્મચારીઓ ખેડૂત અને માલધારીઓનો પહેરવેશ ધારણ કરીને સીમાડે ફરતાં રહેતા હતા.

પોલીસથી બચવા રાસિયો ગામના સીમાડે જંગલ અને ડુંગરાળ વિસ્તારમાં છૂપાઈને રહેતો હોવાના ઈન્પુટ્સના આધારે પોલીસ કર્મચારીઓ દિવસ રાત સતત તેનું પગેરું દબાવવા પ્રયાસરત રહેતા હતા.

પોલીસે તેનું પગેરું દબાવેલું. જંગલ વિસ્તારમાં આવેલા એક નિર્જન ખેતરમાં તે આશરો લેતો હતો. પોલીસે ખેતરની આસપાસ છૂપાઈને સળંગ ત્રણ દિવસ સુધી તેની વૉચ ગોઠવેલી. પરંતુ તેના કોઈ સગડ મળ્યાં નહોતા.

રાસિયો જે ખેતરમાં આશરો લેતો હતો તેના બદલે અન્ય નિર્જન જગ્યાએ આશરો લીધો હોવાનું ધ્યાને આવેલું. બિલ્લી પગે LCBની ટીમ ત્યાં પહોંચી ગયેલી. રાસિયો સૂતો હતો તેનાથી માંડ ૨૦૦ મીટર દૂર પોલીસ સ્ટાફ પહોંચી ગયેલો. જો જરા સરખો અવાજ થાય કે રાસિયાને સ્હેજ પણ ગંધ આવે તો તે ચકમો આપીને નાસી જાય તેવી પૂરી શક્યતા હતી.

તેને ગંધ ના આવે તે માટે LCBના વીરેન્દ્રસિંહ જાડેજા, મયૂરધ્વજસિંહ જાડેજા અને શ્યામ ગઢવીએ ઝાડીઓ અને ઘાસની ઓથ લઈ જમીન પર સરિસૃપની જેમ સરકતાં સરકતાં તેની પાસે પહોંચીને તેને ઊંઘતો જ ધરબોચી લીધો હતો.

૨૦૧૪થી ૨૦૨૪ના છેલ્લાં ૧૨ વર્ષ દરમિયાન રાસુભા સોઢા સામે અંજાર, ભચાઉ, દયાપર, નલિયા, નખત્રાણા, મુંદરા, માનકૂવા, ભુજ, પધ્ધર અને પ્રાગપર પોલીસ સ્ટેશનોમાં દારૂબંધી હેઠળ ૪૬ ગુના નોંધાયેલાં છે. જેમાંથી ૨૦૨૩ અને ૨૪ના વર્ષ દરમિયાન વિવિધ પોલીસ સ્ટેશનમાં નોંધાયેલાં દારૂબંધીના ૯ ગુનામાં તે છેલ્લાં છ વર્ષથી નાસતો ફરતો હતો. છેલ્લે એપ્રિલ ૨૦૧૯માં પોલીસે તેને પાસામાં ફીટ કરેલો.

LCB પીઆઈ મકવાણા અને તેમની ટીમના સાથીઓ ASI વીરેન્દ્રસિંહ જાડેજા, પ્રદ્યુમનસિંહ ગોહિલ, અશ્વિન સોલંકી, સુરેન્દ્રસિંહ ઝાલા, સુનિલ પરમાર, હેડ કોન્સ્ટેબલ મયૂરધ્વજસિંહ જાડેજા, શ્યામ ગઢવી અને કોન્સ્ટેબલ મહેશ ચૌહાણે ‘ઓપરેશન ખોજ’ને સફળતાપૂર્વક પાર પાડ્યું છે.