બાતમીના આધારે મુંદરા કસ્ટમે બે કન્ટેઈનરની તપાસ કરી આ દવાઓ ભરેલાં કન્ટેઈનર જપ્ત કર્યાં છે. સૂત્રોએ જણાવ્યું કે બેઉ કન્ટેઈનરમાંથી ૨૫ મિલિગ્રામની એક ટેબ્લેટની કુલ ૬૮ લાખ ટેબ્લેટ જપ્ત કરાઈ છે. રાજકોટની પેઢી દ્વારા ડાઈક્લોફેનેક ટેબ્લેટ અને જેબેડોલ ટેબ્લેટની આડમાં ટ્રામાડોલની ગોળીઓ આફ્રિકાના સીએરા લીઓન અને નાઈજર દેશમાં નિકાસ કરાતી હતી. કસ્ટમ તંત્રએ તપાસ કરતાં કન્ટેઈનરોની પાછળથી ટ્રામાકિંગ 225 અને રોયલ 225 બ્રાન્ડ નેમની ટ્રામાડોલની ટેબ્લેટનો જથ્થો મળી આવ્યો હતો.

મૂળભૂત રીતે ટ્રામાડોલ ટેબ્લેટનું વર્ગીકરણ ઓપીઓઈડ ડ્રગ્ઝ તરીકે કરાયેલું છે. અર્થાત્ આ દવા અફીણમાંથી બને છે. સામાન્ય રીતે આ દવા શરીરમાં તીવ્ર દુઃખાવો કે પીડા થતી હોય ત્યારે દર્દીને અપાય છે. દર્દીનો કામચલાઉ ધોરણે પીડામાંથી છૂટકારો થાય છે.આ દવા મગજની સેન્ટ્રલ નર્વ્ઝ સિસ્ટમ પર સીધી અસર કરે છે. 

આફ્રિકાના નાઈજીરીયા, ઘાના વગેરે જેવા દેશોમાં સિન્થેટીક (રસાયણોના સંયોજનોથી બનાવેલી કૃત્રિમ દવા) ટ્રામાડોલની ખૂબ ઊંચી માગ છે. મુંદરા કસ્ટમે રાજકોટ ઉપરાંત ગાંધીધામ અને ગાંધીનગરમાં પણ આ કેસ સંદર્ભે દરોડા પાડી તપાસ હાથ ધરી છે.