મુંદરામાં મધરાત્રિથી સવારના ૬ સુધીમાં ૧૦૧ મિ.મી. અને સવારના ૬થી રાત્રિના ૮ સુધીમાં ૧૨૨ મિ.મી.મળી ૨૨૩ મિ.મી. વરસાદ નોંધાયો છે. માંડવીમાં મધરાત્રે ૧૨થી સવારના ૬ સુધીમાં ૬૮ મિ.મી. અને સવારના ૬થી આજે રાત્રિના ૮ વાગ્યા સુધીમાં વધુ ૧૪૭ મિ.મી. સાથે ૨૧૫ મિ.મી. વરસાદ વરસ્યો છે.

લખપતમાં સવારે દસથી બારના બે કલાકમાં ૬૩ મિ.મી. સાથે ત્રણ ઈંચ (૭૭ મિ.મી.) વરસાદ વરસ્યો છે. રાપરમાં સવારે ૮ વાગ્યાથી ધીમી ધારે એન્ટ્રી કરનાર વરુણદેવે દિવસભર ધીંગી ધારે વરસીને રાત્રિના ૮ સુધીમાં ૧૧૦ મિ.મી. પાણી વરસાવી દીધું છે.

એકમાત્ર ભચાઉ શહેર અને તાલુકો કોરો રહી ગયાં છે. પશ્ચિમ કચ્છમાં સતત વરસી રહેલાં ભારે વરસાદના લીધે પંચાયત અને સ્ટેટ હસ્તકના અનેક માર્ગો પર ઘોડાપૂર વહી નીકળતાં વાહનવ્યવહાર પ્રભાવિત થયો છે. ક્યાંક ભારે વરસાદમાં વાહન કાઢવાની હિંમત કરનારા વાહનચાલકોને વાહન સમેત પાણીના ધસમસતાં વહેણમાં ફસાઈ જવાની નોબત પણ આવી છે. લખપતના નરા ગામે આકાશી વીજળી ત્રાટકતાં એક યુવકનું મોત નીપજ્યું હોવાના હેવાલો છે.

સતત વરસી રહેલા વરસાદથી મોટાભાગની નદીઓ બેકાંઠે વહી રહી છે. નાની સિંચાઈના સંખ્યાબંધ ડેમો છલકાઈ ગયાં છે. તો, મધ્યમ સિંચાઈના ૬ ડેમો પણ ઓવરફ્લો થઈ ગયાં છે જ્યારે એક ડેમ ભરાવાના આરે છે. અબડાસાનો કંકાવટી, બેરાચિયા અને મીઠી ડેમ ઓવરફ્લો થઈ જતાં આ ડેમોના પાણી પર નભતાં અનેક ગામોના પીવાના પાણી તથા સિંચાઈનો પ્રશ્ન એકઝાટકે હલ થઈ ગયો છે. એ જ રીતે, લખપતનો ગજણસર, મુંદરાનો કારાઘોઘા, માંડવીનો ડોણ ડેમ પણ ઓવરફ્લો થઈ ગયાં છે. નખત્રાણાનો મથલ ડેમ ૯૫ ટકા ભરાઈ ચૂક્યો છે.

જિલ્લા કલેક્ટર અમિત અરોરાએ જણાવ્યું કે વહીવટી તંત્રની પરિસ્થિતિ પર સતત ચાંપતી નજર છે. જે ડેમો છલકાયાં છે તેની નીચાણવાળા વિસ્તારોમાં આવતાં ગામોના લોકોને સાવચેત રહેવા સૂચના અપાઈ ગઈ છે. જો કે, પરિસ્થિતિ નિયંત્રણ હેઠળ હોઈ ક્યાંય કોઈ સ્થળાંતર કરવાની હજુ જરૂર પડી નથી. લોકોને નદી, નાળાં અને પાણીના વહેણથી દૂર રહેવા સૂચના આપી છે.

માંડવી મામલતદાર વિનોદભાઈ ગોકલાણીએ જણાવ્યું કે માંડવી શહેરમાં આવેલા ટોપણસર તળાવ સાથે નાની સિંચાઈના રાજડા અને જ્યોતેશ્વર ડેમ પણ ઓવરફ્લો થઈ ગયાં છે. તાલુકામાં પંચાયત હસ્તકના ૫ માર્ગો અને માંડવીથી મુંદરાને જોડતાં સ્ટેટ હાઈવે પર નાના ભાડિયા પાસે જળભરાવ થતાં તે માર્ગ બંધ થઈ ગયો છે. બીજી તરફ, જિલ્લા પ્રાથમિક શિક્ષણાધિકારીએ પ્રાથમિક શાળાઓના આચાર્યો, મુખ્ય શિક્ષકો વગેરે જોગ એક એડવાઈઝરી જારી કરીને અપડાઉન કરતાં  છાત્રોને સાવચેત રાખવા તાકીદ કરી છે. ભારે વરસાદની પરિસ્થિતિમાં શિક્ષણકાર્ય ચાલું રાખવા કે ના રાખવા અંગે પોતાની વિવેકબુધ્ધિથી નિર્ણય લેવા સૂચના આપી છે.