જામનગરના જોડિયા તાલુકાના બાલંભા ગામે ૧-૫-૨૦૨૧ના રોજ રેતીના લીઝધારક કાન્તિલાલ રામજી માલવીયાની ઑફિસમાં ચાર શખ્સોએ બંદૂક, ધારિયા, તલવારો વડે ત્રાટકીને હુમલો કર્યો હતો. જોડિયાના કુખ્યાત અયુબ જુસબ જસરાયા અને અસગર હુસેન કમોરાએ રેતીની લીઝ ચલાવવી હોય તો અમને હપ્તા આપવા પડશે તેમ કહી હુમલો કરેલો. જેમાં ગફૂર પણ મદદગારીમાં સામેલ હતો. આરોપીઓએ ફાયરીંગ કરી ઑફિસમાં કાન્તિલાલની હત્યા કરી હતી. આ ગુનામાં જામનગર જેલમાં ફીટ ગફૂર વચગાળાના જામીન પર છૂટી ફરાર થઈ ગયો હતો.

LCBની ટીમે ગફૂરની ધરપકડ કરી તેની પાસેથી એક મોબાઈલ ફોન કબ્જે કર્યો હતો. પોલીસની પૂછતાછમાં ગફૂર અને તેના બે સાગરીતોએ ૧૯-૦૨-૨૦૨૨ની રાત્રે પડાણા નજીક હાઈવે પર ટ્રાન્સપોર્ટ પેઢીના કર્મચારી કુલદિપસિંહ જાડેજાને ધારિયું મારી મોબાઈલ ફોન અને ૧૭ હજારની રોકડ રકમ લૂંટી લીધો હોવાના ગુનાનો પણ ભેદ ઉકેલાયો છે.

ખૂંખાર આરોપીને પકડવાની સફળ કામગીરીમાં પીઆઈ એમ.એન. રાણા, પીએસઆઈ કે.એન. સોલંકી સહિતનો સ્ટાફ જોડાયો હતો.