બાતમીના આધારે ગાંધીધામ એ ડિવિઝન પોલીસે શહેરના ખોડિયારનગરમાં નીલકંઠ મહાદેવ મંદિર પાસે રહેતા રમેશ રામાભાઈ દેવીપૂજક (ઉ.વ. ૩૦)ના રહેણાક મકાનમાં દરોડો પાડીને દસ કિલોથી વધુ ગાંજો જપ્ત કર્યો હતો.

રમેશના કબજામાંથી પોલીસે ૧૪ હજાર ૭૮૫ રૂપિયા અને ભીખાના કબજામાંથી ૫૦ હજાર રોકડાં રૂપિયા મળી આવ્યાં હતા. પોલીસે કુલ રૂપિયા ૬ લાખ ૧૩ હજાર ૭૫૦ના મૂલ્યનો ૧૨ કિલો ૨૭૫ ગ્રામ ગાંજો, ૨૦ હજારના બે ફોન, ૫૦ હજારની એક્ટિવા તથા ૬૪ હજાર ૭૮૫ રોકડાં રૂપિયા મળી ૭ લાખ ૪૮ હજાર ૫૩૫ રૂપિયાનો મુદ્દામાલ કબજે કરી બેઉ સામે એનડીપીએસ એક્ટની ધારાઓ તળે સરકાર તરફે ફરિયાદ નોંધાવી છે. કામગીરીમાં એ ડિવિઝન પીઆઈ એમ.ડી. ચૌધરી સહિતનો સ્ટાફ જોડાયો હતો.

પશ્ચિમ કચ્છ એસઓજીએ મુંદરાના મોટા કાંડાગરા પાસે કારમાં ગાંજો લઈ ઘરાક શોધવા આવનારા શબ્બિર ઈસ્માઈલ વાઘેર (ભુસર) (ઉ.વ. ૩૬, રહે. ત્રગડી, માંડવી)ની ૩ લાખ ૨૨ હજાર ૭૦૦ રૂપિયાની કિંમતના ૬ કિલો ૪૫૪ ગ્રામ ગાંજા સાથે ધરપકડ કરી છે.

પોતાની હોન્ડા મોબિલીયો કારમાં ગાંજો લઈને ગાંજાની વેચસાટ માટે તે કાંડાગરા આવવાનો હોવાની બાતમીના પગલે એસઓજી પીએસઆઈ ડી.બી. વાઘેલા અને પી.સી. સિંગરખિયા સહિતના સ્ટાફે વૉચ ગોઠવી તેને ઝડપી પાડ્યો હતો. પોલીસે ગાંજા ઉપરાંત ૩ લાખની કાર, ૧૦ હજારનો મોબાઈલ ફોન, સાડા ૧૦ હજાર રોકડ રૂપિયા વગેરે મુદ્દામાલ જપ્ત કર્યો છે.

NDPS Act મુજબ એક કિલોથી વધુ ગાંજાનો જથ્થો હોય તો તે ઈન્ટરમીડિએટ જથ્થો ગણાય છે અને તેમાં એકથી દસ વર્ષ સુધીની સજાની જોગવાઈ છે. ઉલ્લેખનીય છે કે એસઓજીમાં લાંબો સમય રહેનારા પીઆઈ કુલદીપ ગઢવીની તાજેતરમાં માનકૂવા પોલીસ મથકમાં ટ્રાન્સફર કરાઈ હતી.