દીપાસર ગામના ભરતભાઈ વેઝીયાએ પોલીસને જાણ કરેલી કે તેમના ગામના સીમાડે એક રહેણાંક મકાનમાં ગેરકાયદે કૉલ સેન્ટર ચાલે છે. બોર્ડર રેન્જ આઈજી ચિરાગ કોરડીયાની સૂચના અને માર્ગદર્શન તળે પીઆઈ એલ.પી. બોડાણા, મહિલા પીઆઈ કે.એમ. રાઠોડ અને તેમની ટીમે આ રહેણાંક મકાનમાં દરોડો પાડ્યો હતો.

પોલીસે જણાવ્યું કે આરોપીઓ ભારતમાં બેઠાં બેઠાં વિશ્વના વિવિધ દેશોના નાગરિકોને ફોન કરી લોન આપવાની લાલચ આપીને તેમના બેન્ક એકાઉન્ટની માહિતી કઢાવીને અલગ અલગ ચાર્જીસના નામે રૂપિયા પડાવવાનો ધંધો કરતાં હોવાનું પ્રાથમિક તપાસમાં બહાર આવ્યું છે. કૉલ સેન્ટરનો સૂત્રધાર અમદાવાદનો સ્વપ્નિલ પટેલ ઊર્ફે સૅમ છે, જે પોલીસના હાથમાં આવ્યો નથી.

પોલીસે કૉલ સેન્ટરમાંથી ૨૫ લેપટોપ, ૩૦ મોબાઈલ ફોન, ૧૯ હેડફોન, ૫ યુપીએસ, ૧૦ નંગ ચાર્જર, ૮ ડેટા કેબલ, ૮ ઈયર ફોન, ૪ રાઉટર મળી કુલ ૬ લાખ ૫૦ હજાર ૯૦૦ રૂપિયાનો મુદ્દામાલ ઉપરાંત આરોપીઓના અંગત વપરાશના ૨૦ ફોન, દોઢ લાખનું એક ટેબ્લેટ, ૩૬ હજાર રૂપિયા રોકડાં મળી કુલ ૮ લાખ ૩૬ હજાર ૯૦૦ રૂપિયાનો મુદ્દામાલ જપ્ત કર્યો છે.

પોલીસે પકડેલાં યુવકોમાં અમિષ ધર્મેન્દ્ર પટેલ (યુપી), રોનકકુમાર સુનિલ મહિડા (આણંદ), નંદનદાસ રાજારામદાસ (કોલકત્તા), પ્રિન્સ પવન સાવ (કોલકત્તા), કુંદનકુમાર રાજારામ દાસ (કોલકત્તા), ઈપલો વિકૂટો ચોપી (નાગાલેન્ડ), અંકુવ હકાવી ચેપાઠોમીન (નાગાલેન્ડ), કનૈયાકુમાર ઝા (કોલકત્તા), ચિરાગ રાવલ (વડોદરા), વિશાલ બળવંત ઠાકુર (હિમાચલ પ્રદેશ)નો સમાવેશ થાય છે. જ્યારે, પકડાયેલી યુવતીઓમાં લાલનુપૂઈ હૌહનાર (ઐઝલ, મિઝરોમ), વાનલાલજુયલ રાલટે (મિઝોરમ), મેલોડી (મિઝોરમ), જુલિએટ (મિઝોરમ), લોવિકા કિહો (નાગાલેન્ડ) અને મીમ્મી લાલલીનીયાના (મિઝોરમ)નો સમાવેશ થાય છે.