ચુનડી ગામે રહેતો ૩૬ વર્ષિય મહિપતસિંહ ભીમજી જેઠુજી સોઢા કશો કામ ધંધો કરતો નહોતો. પત્ની ચેતનાબા તેને કામ ધંધો કરવા અવારનવાર ઠપકો આપતો રહેતી હતી. મહિપત અવારનવાર પત્નીને ઢોર માર મારતો રહેતો હતો. આ જ મુદ્દે ૧૬મી જાન્યુઆરી ૨૦૨૩ની રાત્રે દંપતી વચ્ચે માથાકૂટ થયેલી.

હત્યા બાદ મહિપતે સંતાનોને ખાટલા, ગોદડાં, તકિયા અને નીચે ટાઈલ્સ પર પડેલાં લોહીના ડાઘ લૂછી લેવાનું કહીને પુરાવાનો નાશ કરવા પ્રયાસ કરેલો.

બનાવ અંગે માનકૂવા પોલીસે મહિપત વિરુધ્ધ ઈપીકો કલમ ૩૦૨ (હત્યા), ૨૦૧ (પુરાવાનો નાશ કરવો) અને ગુજરાત પોલીસ એક્ટની કલમ ૧૩૫ (ધોકો રાખી હથિયારબંધીના જાહેરનામાનો ભંગ) હેઠળ ગુનો નોંધી તપાસ કરેલી. તત્કાલિન પીઆઈ ડી.આર. ચૌધરીએ આરોપીની ધરપકડ કરીને ૨૦ સાક્ષી અને ૪૨ દસ્તાવેજી આધારો સાથે કૉર્ટમાં ચાર્જશીટ કરેલી. આ કેસમાં હત્યાને નજરે જોનાર સગીર વયના દીકરો અને દીકરી, આરોપીના સગાં ભાઈ સાહેબજીની ગુનાને સમર્થનકારી જુબાની અત્યંત મહત્વપૂર્ણ બની રહી હતી.

પોસ્ટ મોર્ટમ રીપોર્ટમાં મરણ જનારના શરીરે ગંભીર ઈજાના ૨૩ નિશાન હોવાનું સ્પષ્ટ થયેલું.

મહિપત અવારનવાર તેની પત્નીને ઢોરની જેમ માર મારતો હતો. હત્યાના બનાવ અગાઉ ૨૩-૧૦-૨૦૧૯ના રોજ મહિપતે ધોકાથી માર મારીને પત્નીના બેઉ હાથ ભાંગી નાખેલાં અને તે અંગે પત્નીએ માનકૂવા પોલીસ મથકે ફરિયાદ પણ નોંધાવી હતી. ફરિયાદ પક્ષે આ બાબતે પણ રજૂઆત કરીને ફરિયાદ નોંધનાર પોલીસ સ્ટેશન ઑફિસરને સાક્ષી તરીકે રજૂ કર્યો હતો.

બચાવ પક્ષે જમીનના ઝઘડામાં આરોપીના ભાગની જમીન હડપ કરવા માટે તેને ખોટાં કેસમાં ફીટ કરવા સગાં ભાઈ સહિતના લોકોએ કેસ કર્યો હોવાની, ૨૦૧૯ અને ૨૦૨૩ના કેસ જુદાં જુદાં હોવાનું, અમુક સાક્ષીઓની જુબાનીમાં વિરોધાભાસ હોવા સહિતના મુદ્દે આરોપીએ ગુનો કર્યો ના હોવાનો બચાવ રજૂ કરેલો. પરંતુ, મોટાભાગના સાક્ષીઓએ આપેલી ગુનાને સમર્થનકારી જુબાની તથા અન્ય પુરાવાના આધારે ભુજના સેશન્સ જજ દિલીપ પી. મહિડાએ મહિપતને જનમટીપ ફટકારી ધાક બેસાડતો ચુકાદો આપ્યો છે. આ કેસમાં સરકાર તરફે એડવોકેટ પ્રવિણ વાણિયા અને સુરેશ મહેશ્વરીએ દલીલો કરી હતી.