કોંગ્રેસ અને મુસ્લિમ સમાજના આગેવાન જુમા રાયમાએ પોતાને બદનામ કરવા અને રાજકીય કારકિર્દી પૂરી કરવા માટે કોંગ્રેસ અને મુસ્લિમ સમાજના જ કેટલાંક આગેવાનોના ઈશારે કાવતરું ઘડાયું હોવાની FIR નોંધાવતાં કચ્છમાં ચકચાર મચી ગઈ છે.

કચ્છ કોંગ્રેસના મહિલા મોરચામાં અગાઉ હોદ્દેદાર તરીકે રહી ચૂકેલી દિપ્તી ઠક્કરે કોંગ્રેસના હોદ્દેદારો પર ગંભીર આરોપ કર્યાં હોવા છતાં તેની સામે પ્રદેશ કોંગ્રેસે કોઈ પગલાં ના લેતાં હાજી જુમા રાયમાએ ૧ એપ્રિલના રોજ પ્રદેશ કોંગ્રેસની ચૂંટણી સમિતિમાંથી રાજીનામું આપી દીધું હતું. જો કે, હવે દિપ્તી સહિતના ૧૪ લોકો પર તેમણે મધરાત્રે ગાંધીધામ એ ડિવિઝન પોલીસ મથકમાં ફોજદારી ફરિયાદ દાખલ કરતાં મુસ્લિમ સમાજ અને કોંગ્રેસમાં ભારે ચકચાર મચી ગઈ છે.

૧૧ નવેમ્બરના રોજ સમાજના ધર્મગુરુ શેખ સૈયદ હાસીમ અલ ગિલાની કચ્છની મુલાકાતે આવેલાં. તે સમયે જુમા રાયમાએ ધર્મગુરુને આવકારતી જાહેરખબર કચ્છના વિવિધ અખબારોમાં પ્રગટ કરાવી હતી. સાંજે જુમાભાઈના ઘરે ધર્મગુરુના દર્શન અને પ્રવચનનો કાર્યક્રમ હતો ત્યારે ભુજની કે.પી. ન્યૂઝ ચેનલનો કહેવાતો પત્રકાર ઈરફાન ઈબ્રાહિમ હાલેપોત્રા ન્યૂઝ કવરેજના નામે ત્યાં વગર આમંત્રણે આવી ચઢેલો.

૧૪ નવેમ્બરે જુમાભાઈ અને તેમના મિત્રો પરિચિતો ધર્મગુરુને વિદાય આપવા ભુજ એરપોર્ટ પહોંચેલા તે સમયે ઈરફાન ફરી ત્યાં ન્યૂઝ કવરેજના નામે આવી ચઢેલો. તેણે સૌની હાજરીમાં જુમાભાઈને ધમકી આપેલી કે ‘મને જાહેરાતના ૨૦ હજાર રૂપિયા નથી, આ ૨૦ હજાર તમને ૨૦ લાખમાં પડશે’

૧ માર્ચના રોજ કે.પી. ન્યૂઝમાં જુમાભાઈની પરિચિત મહિલા સલમા ગંઢનો એક વીડિયો ન્યૂઝ તરીકે પોસ્ટ થયેલો. જેમાં સલમાએ એવો આરોપ કરેલો કે જુમા રાયમાએ મારા ઘરે આવી, મને ઝાપટ મારેલી. હકીકતમાં સલમાના ઘરે પારિવારિક ક્લેશ થતાં સલમાના પુત્રએ જ ફોન કરીને જુમા રાયમાને ઘરે બોલાવેલાં. આ સમયે સમજાવટની દ્રષ્ટિએ જુમાભાઈએ  સલમાને ટાપલી મારેલી. સલમાના આરોપ અંગે ફરિયાદીના પુત્ર અને ભાઈએ સલમાને મળીને વાત કરતાં સલમાએ પણ પાછળથી આ ખુલાસો કરીને કહેલું કે મારે જુમાભાઈ જોડે કોઈ મનદુઃખ નથી.

સલમા ગંઢે જુમાભાઈ કરેલા આરોપને લઈને એકાએક અંજારની પૂર્વ કોંગ્રેસી કાર્યકર દિપ્તી મહેશભાઈ ઠક્કર (ખત્રી) મેદાનમાં આવેલી. તેણે કે.પી. ન્યૂઝ પર ઈન્ટરવ્યૂ આપતા કહેલું કે જુમા રાયમાએ સલમા પર અત્યાચાર કર્યો છે, સલમાએ મને નથી કહ્યું પરંતુ હું મારી રીતે મદદ કરવા તૈયાર છું.

આ વીડિયોમાં દિપ્તીએ ગંભીર આરોપ કરેલો કે ૧૭ વર્ષ અગાઉ મુંબઈમાં કરેલા જમીનના એક સોદામાં જુમા રાયમા મારી દલાલીના ૨૦ લાખ રૂપિયા ખાઈ ગયો હતો. રૂપિયા પાછાં આપતો નથી. આ આરોપ અંગે જુમાભાઈના મિત્રો દિપ્તીને સમજાવવા ગયા ત્યારે દિપ્તીએ તેમને કહેલું કે મને ૨૦ લાખ અપાવી દો તો હું વીડિયો કઢાવી દઈશ, નહીં તો રોજ નવા નવા વીડિયો આવશે. ફરિયાદીએ જણાવ્યું કે દિપ્તી ૨૦ લાખ રૂપિયા માંગતી હોવાના તેની પાસે કોઈ આધાર પુરાવા નહોતા. તેમ છતાં દિપ્તીએ પાંચ લાખ મળે તો વીડિયો હટાવી દેવાની વાત જણાવેલી.

જુમાભાઈના મિત્રો સમક્ષ દિપ્તીએ એમ પણ કહેલું કે ‘હું એકલી નથી. મુસ્લિમ સમાજના અન્ય માણસો પણ મારી સાથે છે, જુમાને હું મૂકીશ નહીં’ સલમાએ પણ દિપ્તીને મળીને કહેલું કે મારી જુમા રાયમા સાથેની મેટર પૂરી થઈ ગઈ છે. તે સમયે દિપ્તીએ જુમા પાસેથી ૨૦ લાખ રૂપિયા અપાવવા સલમાને કહેલું. એટલું જ નહીં જુમાના અશ્લીલ વીડિયો બનાવીશ અને સમાજમાં મોઢું બતાડવા કે જીવવા લાયક નહીં રહેવા દઉં તેવી ધમકી આપેલી.

જુમા રાયમાએ ફરિયાદમાં જણાવ્યું કે દિપ્તીના આરોપથી મારી ધાર્મિક લાગણીને ઠેસ પહોંચેલી. ‘મેં બંગડી નથી પહેરી, તાકાત હોય તો સામે આવે’ તેમ કહીને દિપ્તીએ પોતાને ધમકી પણ આપેલી.

જુમાભાઈએ કચ્છખબરને જણાવ્યું કે યુટ્યુબ ચેનલમાં પોતાની બદનામી કરતાં વીડિયો મૂકવા સંદર્ભે તેમણે કે.પી. ન્યૂઝના ઈરફાન હાલેપોત્રા અને દિપ્તી ઠક્કર વિરુધ્ધ પોલીસ મથકે પંદરેક દિવસ અગાઉ અરજી આપેલી. પોલીસે તપાસ કરતાં આ બેઉ જણને હાથો બનાવીને કોંગ્રેસ અને સમાજના જ અનેક લોકો પોતાને બદનામ કરવાનું કાવતરું રચ્યું હોવાની તેમના વાર્તાલાપની ૪ હજારથી વધુ ક્લિપો મળી છે. વિવિધ વોઈસ રેકોર્ડીંગ, સોશિયલ મીડિયામાં વાયરલ થયેલાં સ્ક્રીન શોટ્સના આધારે તેમણે ફરિયાદ નોંધાવી છે. 

ફરિયાદીએ જણાવ્યું કે મને જાણવા મળેલું કે ઝકરીયા કુંભાર (ભુજપુર, મુંદરા)એ સલમાને કહેલું કે હું સલીમ અહેમદ જત (પૂર્વ જિલ્લા ઉપ પ્રમુખ, કોંગ્રેસ અને સુન્ની મુસ્લિમ હિતરક્ષક સમિતિના પ્રમુખ)ની ઑફિસે બેઠેલો છું. જુમાભાઈ વિરુધ્ધ બીજા વધારે ખોટાં પુરાવા ઊભાં કરો, રમજાન પછી મોટું પ્લાનીંગ કરીને જુમાની કારકિર્દી ખતમ કરી દઈએ તેવી વોટસએપ ચેટ વાયરલ થયેલી.

આરોપીઓ સામેના પુરાવા તપાસ સમયે પોતે રજૂ કરશે તેમ જુમા રાયમાએ જણાવ્યું છે.

રાયમાએ પોતાની પાસેથી ખોટી રીતે બળજબરીથી રૂપિયા પડાવવાના હેતુ પોતાને બદનામ કરવાનું કાવતરું રચી, પ્રતિષ્ઠાને હાનિ પહોંચે તેવા ખોટાં વીડિયો બનાવીને કે.પી. ન્યૂઝ યુટ્યુબ ચેનલમાં અપલોડ કરીને રૂપિયા નહીં આપતાં અશ્લીલ વીડિયો બનાવી ચેનલ પર અપલોડ કરવાની ધમકીઓ આપી તેમજ મહંમદ પયંગબર સાહેબનું નામ લઈને સમગ્ર મુસ્લિમ સમાજની લાગણી દુભાવી આરોપીઓએ ગુનો આચર્યો હોવાનો ગંભીર આરોપ કરતી ફરિયાદ અન્વયે પોલીસે ભારેખમ કલમો તળે ગુનો દાખલ કર્યો છે.

આરોપીઓમાં ઈરફાન હાલેપોત્રા (કહેવાતો પત્રકાર), ઈસ્માઈલ સાલે બાફણ (નાંગિયારી, ભુજ), ભુજનો સત્તાર માંજોઠી (અગાઉ ગાંધીધામમાં અગાઉ નકલી ઈડી ઑફિસર બનીને આચરેલા લૂંટના ગુનાનો આરોપી), તાહિર ભટ્ટી (ભુજ), ઈશાક જુમા જત (સુમરાસર, ભુજ), લતીફ ગગડા (લોડાઈ, ભુજ), ઝકરીયા કુંભાર (ભુજપુર, મુંદરા), સલીમ અહેમદ જત (મુંદરા), આમીરશા સૈયદ (બારોઈ, મુંદરા), ઈકબાલ મંધરા (કોઠારા, અબડાસા), સુલેમાન રાઉમા (જંગી, ભચાઉ), હનીફશા શેખ (પ્રમુખ, સુન્ની મુસ્લિમ હિતરક્ષક સમિતિની યુવા પાંખનો પ્રમુખ, રહે. અંજાર), દિપ્તી મહેશભાઈ ઠક્કર (અંજાર), આદમ પડેયાર (ભુજ)નો સમાવેશ થાય છે.