ફરિયાદીએ જણાવ્યું કે આર્મીના વોટસએપ ગૃપમાં તેના મિત્ર લવકુશ અહીરવારે ૧૦ માર્ચના રોજ એક મેસેજ નાખેલો કે ‘કોઈને આર્મી ગૃપ ઈન્સ્યોરન્સ ફંડ AGIFમાંથી લોન જોઈતી હોય તો જણાવજો, મદદ કરશે’ ફરિયાદીએ મિત્ર લવકુશ જોડે વાત કરતા તેણે સાગર ગુલેરીયા નામના શખ્સનો મોબાઈલ નંબર આપીને તે લોન મંજૂર કરાવવામાં મદદ કરતો હોવાનું જણાવીને પોતે પણ તેની મદદથી લોન મેળવવા પ્રોસેસ કરી હોવાનું ઉમેરેલું.

ફરિયાદીએ સાગર ગુલેરીયાનો કોન્ટેક્ટ કરતા સાગરે પોતે પણ આર્મી જવાન હોવાનું કહીને ઘણાં જવાનોને AGIFમાંથી લોન મંજૂર કરાવવામાં મદદ કરી હોવાનું કહી વિશ્વાસમાં લીધેલો. એટલું જ નહીં, લોન પર સારી સબ્સિડી મળતી હોવાનું કહેલું. ફરિયાદી ઉમેશકુમારે ૧૫ લાખની લોન મેળવવાની ઈચ્છા દર્શાવેલી.

સાગરની વાતોમાં ભોળવાઈ જઈને ફરિયાદીએ તેને વોટસએપ પર પોતાના આધાર કાર્ડ, બેન્ક ખાતાં નંબર, પાન કાર્ડ વગેરે દસ્તાવેજો મોકલી આપેલાં.

૧૮ માર્ચના રોજ ફરિયાદીને AGIFના લોન ડિવિઝનમાંથી ઈ-મેઈલ મળેલો. જેમાં ફરિયાદીના ખાતામાં લોન પેટે ૧૬.૧૫ લાખ રૂપિયા જમા થયાં હોવાની વિગત હતી. લોનની રકમ ફરિયાદીના બેન્ક ખાતામાં જમા થઈ ગયેલી. ૧૫ લાખની લોનની માંગણી સામે ૧૬.૧૫ લાખ રૂપિયા જમા થતાં ઉમેશકુમારનો સાગર પરનો વિશ્વાસ વધુ પ્રગાઢ થયો હતો.

લોનની રકમ જમા થયાં બાદ સાગરે ઉમેશકુમારને ફોન કરીને જણાવેલું કે ‘લોનની રકમ AGIFના ખાતાઓમાં જમા કરાવવી પડશે, ત્યારબાદ આ રકમ એકસાથે ફરીથી તમારા ખાતામાં જમા થશે અને ત્યારપછી લોનની રકમ ઉપાડી શકાશે’

નાણાં ટ્રાન્સફર કર્યાંના અઠવાડિયા સુધી પરત જમા ના થતાં ઉમેશે સાગરને ફોન કરી પૂછપરછ કરતાં તેણે બહાના કર્યાં હતા. ફરિયાદીએ તેના મિત્ર અહીરવારને પૂછપરછ કરતાં અહીરવારે પણ સાગર ફ્રોડ હોવાનું જણાવેલું. જેથી ઉમેશે ઓનલાઈન સાયબર ક્રાઈમ હેલ્પલાઈનમાં ફરિયાદ નોંધાવતા તેના આધારે ભુજ સાયબર ક્રાઈમ પોલીસે સાગર ગુલેરીયા સામે ઠગાઈ અને વિશ્વાસઘાતની કલમો તળે ગુનો નોંધી તપાસ હાથ ધરી છે.