ફરિયાદી ડૉ. રોયે ભુજ બી ડિવિઝન પોલીસ મથકે આપેલી ફરિયાદમાં જણાવ્યું કે ગાંધીનગરની વડી કચેરી દ્વારા વર્ષ ૨૦૧૭થી ૨૦૨૬ દરમિયાન થયેલી નાણાંકીય લેવડદેવડનું આંતરિક ઑડિટ હાથ ધરવામાં આવ્યું હતું. જેમાં ડી.જી. નાકરાણી નામના ICICI બેન્ક ખાતામાં ૨૦૨૧થી ૨૦૨૬ દરમિયાન જિલ્લા તીજોરી કચેરી દ્વારા ૧ કરોડ ૧૫ લાખ ૬૨ હજાર ૭૧૧ રૂપિયા જમા કરાવાયાં હોવાનું બહાર આવેલું. આ ખાતામાં જુદાં જુદાં ટ્રાન્ઝેક્શન મારફતે વધુ ૯ લાખ ૫૨ હજાર ૯૫૧ રૂપિયા જમા થયેલાં. પરંતુ આ નાણાં કોણે જમા કરાવેલાં તે સ્પષ્ટ થયું નથી. આમ, આ બેન્ક ખાતામાં કુલ ૧ કરોડ ૨૫ લાખ ૧૫ હજાર ૬૬૨ રૂપિયા જમા થયા હતા.

જિલ્લા તીજોરી કચેરી દ્વારા સિવિલ સર્જન કચેરીને જુદાં જુદાં હેડ હેઠળ મળનારાં સરકારી નાણાં તીજોરી કચેરી દ્વારા આ ખાનગી બેન્ક ખાતામાં જમા થયેલાં. ઘટનાને ગંભીરતાથી લઈ પોલીસને અરજી કરાયેલી. પોલીસે આ બેન્ક ખાતાંની વિગતો તપાસતાં તે ખાતું મિતેશ ધીરજલાલ ચુડાસમા (રહે. કૈલાસનગર, એસટી વર્કશોપ પાસે, ભુજ) નામના શખ્સના આધાર કાર્ડ સહિતના દસ્તાવેજો પર ખોલાવવામાં આવ્યું હતું.

બેન્ક ખાતું ખોલાવવા માટે સિવિલ સર્જન કચેરીના વહીવટી અધિકારીએ બેન્ક મેનેજરને પત્ર લખેલો અને તેમાં આપેલો મોબાઈલ નંબર બલભદ્ર જાડેજાનો હતો તથા એકાઉન્ટ ખોલાવનાર કર્મચારી તરીકે બલભદ્રે સહી કરી હતી.

વાહન અકસ્માત યોજના હેઠળ જે ખાનગી હોસ્પિટલોના બિલો જનરલ હોસ્પિટલ, ભુજને રજૂ કરવામાં આવે છે તે બિલના નાણાંનું ચૂકવણું જિલ્લા તીજોરી કચેરી ઈ પેમેન્ટ દ્વારા જે-તે ખાનગી હોસ્પિટલના બેન્ક ખાતામાં જમા કરાવે છે. તપાસમાં બહાર આવેલું કે આઉટસોર્સ એજન્સીના આવતા બિલની અસલ કોપી પરથી ઝેરોક્સ કરાવી, અસલ બિલના આધારે મૂળ એ જ એજન્સીને Escrow Account મારફતે નાણાં ચૂકવવામાં આવતાં.

એ જ રીતે, કોઈ સંજોગોમાં બેન્કની ડિટેઈલ સાથે વિગતો ના મળે અને પેમેન્ટ રીજેક્ટ થાય તો સાદી રસીદથી બિલ મેળવી પાર્ટી ચેક મેળવી પેમેન્ટ કરાય છે. તે સંજોગોમાં પાર્ટીના નામનું એકાઉન્ટમાં દર્શાવેલું નામ અને બિલમાં દર્શાવેલ નામ સમાન હોવાથી તે પાર્ટીના નામનો ચેક મેળવી બેન્ક એકાઉન્ટમાં જમા કરાવાય છે.

આ કૌભાંડ બહાર આવતા ૨૨-૦૯-૨૦૨૫ના રોજ બલભદ્રને બરતરફ કરી દેવાયો હતો. જો કે, ડી.જી. નાકરાણીવાળા બેન્ક એકાઉન્ટમાં છેલ્લે ૧૩-૦૫-૨૦૨૬ના રોજ ટ્રાન્ઝેક્શન થયું હોઈ જાડેજા દ્વારા તે ખાતામાં હજુ પણ ગોલમાલ કરાતી હોવાની શંકા દર્શાવાઈ છે. જાડેજાએ તેના સાગરીત મિતેશ ચુડાસમા અને અન્ય લોકોની મદદથી આ કૌભાંડ આચર્યું હોવાનું ફરિયાદમાં લખાવાયું છે. બંને ખાતામાં જમા થતાં નાણાં અન્ય એકાઉન્ટમાં ટ્રાન્સફર કરી દેવાતા હતા તથા એટીએમથી રોકડાં કાઢી લેવાતાં હતા. ૨૦૧૯થી બલભદ્ર આ કૌભાંડ આચરી રહ્યો હતો,

હજુ ૨૦૨૧માં જમા થયેલાં બિલોની ભૌતિક ચકાસણી ચાલુ છે. આ તપાસ બાદ હજમ થયેલી રકમનો આંકડો હજુ વધવાની શક્યતા છે. આ કૌભાંડમાં મેન્ટલ હોસ્પિટલ અને સિવિલ સર્જન કચેરીના અન્ય કર્મચારીઓ અધિકારીઓના પગ તળે પણ રેલો આવવાની શક્યતા સેવાઈ રહી છે.