પાકિસ્તાનના કરાચીથી મુંદરા આવી રહેલા એક કન્ટેઈનર શીપમાં ડ્રગ્ઝ હોવાની અને ભારતમાં તેની ડિલિવરી થવાની હોવાની બાતમીના પગલે ATSએ કોસ્ટગાર્ડની મદદથી રાતના અંધારામાં પોર્ટ પર લાંગરવાની રાહમાં આઉટર એન્કરેજ એરિયામાં રહેલા જહાજોની સઘન તપાસ હાથ ધરી હતી.

MV યુરોપ નામના કન્ટેઈનર શીપમાંથી આ વસ્તુઓ ફેંકાઈ હોઈ પોલીસ કાફલો ત્યાં દોડી ગયો હતો. પોલીસને આવતી જોઈ શીપમાં રહેલો એક શખ્સ પણ કૂદકો મારીને દરિયાના પાણીમાં ગરક થઈ ગયો હતો.

તપાસ કરી રહેલી ટીમે તુરંત દરિયામાં ફેંકાયેલા ડ્રગ્ઝના છ કોથળા પૈકી પાંચ કોથળા જપ્ત કરી લીધા હતા. આ કોથળાઓમાંથી ૧૧૮.૯૭ કિલોગ્રામના કોકેઈન ડ્રગ્ઝના ૧૧૫ પેકેટ જપ્ત કર્યાં હતા. આંતરરાષ્ટ્રીય કિંમત મુજબ જપ્ત થયેલા ડ્રગ્ઝનું મૂલ્ય ૧૧૫૦ કરોડ રૂપિયા હોવાનું ઈન્ડિયન કોસ્ટગાર્ડે જાહેર કર્યું છે.

ATSની આ મહત્વની સફળતા અંગે ગુજરાતના પોલીસ વડા કે. લક્ષ્મી નારાયણ રાવે જણાવ્યું કે શીપમાં સવાર આફ્રિકન દેશ તાન્ઝાનિયાના નાગરિક જુમા નાસિર ઓમરને પકડી લેવાયો છે. દરિયામાં કૂદી પડેલો શખ્સ જુમાને નામનો યુવક હતો. સમુદ્રમાં ફેંકી દેવાયેલા કોકેઈનનો છઠ્ઠો કોથળો અને દરિયામાં કૂદી પડેલાં જુમાનેની શોધખોળ કરવા ભારે પ્રયાસો હાથ ધરાયાં છે પરંતુ કોઈનો પત્તો મળ્યો નથી.

જપ્ત થયેલાં કોકેઈનના કોથળાઓ પર ચાર એપલ એરટેગ લગાડાયેલાં હતા. ખોવાયેલી ચીજવસ્તુ ક્યાં પડી છે તે જાણવા માટે એપલ એરટેગનો ઉપયોગ થાય છે.

આ એરટેગ સતત બ્લૂટૂથ લૉ એનર્જી સિગ્નલ છોડ્યાં કરે છે અને આઈફોન, આઈપેડ કે મેક જેવી સિસ્ટમ મારફતે તેને એકદમ સચોટ રીતે ટ્રેક કરી શકાય છે. શીપમાંથી બે ગાર્મિન GPS અને સેટેલાઈટ કૉમ્યુનિકેટર્સ પણ જપ્ત કરાયાં છે. ગાર્મિન GPS સેટેલાઈટ આધારીત નેવિગેશન સિસ્ટમ છે અને ભારતમાં તેનો ઉપયોગ પ્રતિબંધિત છે.

ડૉ. રાવે જણાવ્યું કે ઝડપાયેલાં જુમા નાસિર ઓમરની પ્રાથમિક પૂછપરછમાં સામે આવ્યું છે કે સાયપ્રસ દેશનો ફ્લેગ ધરાવતા આ જહાજના મોટર રૂમમાં નવેમ્બર ૨૦૨૫થી ડ્રગ્ઝનો જથ્થો છૂપાવાયો હતો. કોકેઈનનો જથ્થો બ્રાઝિલથી લોડ કરાયો હતો. ત્યારબાદ આ શીપ લેટિન અમેરિકા, મેક્સિકો, અમેરિકા અને કરાચી થઈ ગુજરાતના મુંદરા આવ્યું હતું.

કોકેઈનનો જથ્થો મુંદરાથી દિલ્હી મોકલવાનો હતો. દિલ્હીમાં રહેતા બે વિદેશી નાગરિકોને માલ મળવાનો હતો. જેના પગલે ATSએ દિલ્હીના દ્વારકા વિસ્તારમાંથી કેલ્વિન ચુકવુમા નામના નાઈજીરીયન યુવક અને યુગાન્ડાના બાયરુહાંગા જેમ્સ નામના યુવકની ધરપકડ કરી લેવાઈ છે. બેઉને વિશેષ પૂછપરછ માટે દિલ્હીથી અમદાવાદ લવાઈ રહ્યાં છે.

પોલીસને આશંકા છે કે કસ્ટમની તપાસમાં પકડાઈ જવાય નહીં તે માટે ડ્રગ્ઝનો જથ્થો કન્ટેઈનરમાં નહીં પરંતુ મોટર રૂમમાં છૂપાવાયો હતો. દરિયામાં નાની બોટમાં ડ્રગ્ઝ ઠાલવીને લઈ જવાનું હશે. તપાસ એજન્સીથી બચવા કદાચ દરિયામાં પેકેટ નાખી દેવાય તો પાછળથી એપલ એરટેગની મદદથી તેને લોકેટ કરી રીકવર કરી લેવાનો પ્લાન હશે. ડ્રગ્ઝની આ હેરાફેરીમાં મુખ્ય સૂત્રધારો કોણ છે તે અંગે આરોપીઓની સઘન પૂછપરછમાં ભેદ ખૂલવાની શક્યતા છે.