આ પ્રવૃત્તિમાં જે-તે વિસ્તારના પોલીસ ઈન્સ્પેક્ટરોથી લઈને એસપી અને રેન્જ આઈજી કક્ષાના અધિકારીઓ સંડોવાયેલાં છે.

હુંબલે આરોપ કર્યો કે જિલ્લા પંચાયતની બેઠકો પર કોંગ્રેસના અનેક ઉમેદવારોને ૩૦થી ૩૫ લાખની ઑફરો કરાઈ છે. મોડી રાત સુધી પોલીસે કોંગ્રેસના ઉમેદવારોના ઘર સુધી પહોંચીને ઉમેદવારી પત્ર પરત ખેંચાવવા પ્રયાસો કર્યાં છે.

ઘણાં ઉદ્યોગપતિઓએ પણ મોડી રાત્રે ત્રણથી ચાર વાગ્યા સુધી ફોર્મ પરત ખેંચાવવા પૂરજોશમાં મહેનત કરી હતી. કેટલાંક ઉદ્યોગપતિઓએ સરકારનું દબાણ હોવાનું અને મજબૂરી હોવાનું પોતાની સમક્ષ કબૂલ્યું હોવાનું હુંબલે ઉમેર્યું છે.

અંજાર તાલુકા પંચાયતની વીરા બેઠક પર આહીર સેના દ્વારા સમર્થિત ઉમેદવાર ઊભો રખાયેલો પરંતુ છેલ્લાં દિવસે તેણે ફોર્મ પરત ખેંચી લઈને કોંગ્રેસ સાથે વિશ્વાસઘાત કર્યો. આહીર સમાજની ઓળખ વટ વચન અને આશરાની રહી છે ત્યારે આ ઘટનાએ આહીર સમાજની ગરિમાને પણ ઠેસ પહોંચાડી છે. એ જ રીતે, જિલ્લા પંચાયતની ભચાઉ તાલુકાની મોટી ચીરઈ અને ભચાઉ તાલુકા પંચાયતની ઘણી બેઠકો ભાજપે બિનહરીફ કરાવી છે તેમાં ૪૦થી ૫૦ લાખ સુધીનો વહીવટ થયો છે. ભાજપ વિકાસના બણગાં ફૂંકે છે તો કોંગ્રેસના ઉમેદવારોના ફોર્મ પરત ખેંચાવવાની કેમ જરૂર પડે છે?

ફોર્મ ચકાસણી પ્રક્રિયા દરમિયાન ચૂંટણી અધિકારીઓએ ભાજપના દબાણ હેઠળ કામગીરી કરી હોવાનો તેમણે આરોપ કર્યો છે. 

માંડવી તાલુકા પંચાયતની મોટી મઉંની બેઠક પર ભાજપના ઉમેદવારને ત્રણ સંતાન હોવા મુદ્દે ફોર્મ રદ્દ કરવા સરકારી રેકર્ડના આધાર સાથે રજૂઆત કરાયેલી પરંતુ માન્ય ના રખાઈ.

હકીકતે ગુજરાતમાં કેવળ કારડીયા રાજપૂતનો ઓબીસીમાં સમાવેશ થયેલો છે, અન્ય કોઈ રાજપૂતનો નહીં તે જગજાહેર છે. એ જ રીતે, ભુજ નગરપાલિકાના વૉર્ડ નંબર ૪ અને ૭માં ટેકેદારે ઉમેદવારી ફોર્મમાં સહી કરેલી હોવા છતાં પાછળથી ભાજપના દબાણ હેઠળ ‘મારી સહી નથી’ તેવી ખોટી એફિડેવિટો કરાવીને કોંગ્રેસના ઉમેદવારોના ફોર્મ રદ્દ કરાવાયાં. ખરેખર તો સહી સાચી છે કે ખોટી તે FSL મારફત ખરાઈ કરાવવી જોઈએ.

હકીકતે ચૂંટણી જાહેરાનામા મુજબ ઉમેદવારો માટે ફોર્મ પરત ખેંચવાની તારીખ આજની એટલે કે ૧૫ એપ્રિલ નિયત કરાયેલી છે. ભાજપે સત્તાનો દુરુપયોગ કરી, લોભ-લાલચ, ડર, ધાક-ધમકી મારફતે કોંગ્રેસના ઉમેદવારોને બેસાડવા પ્રયાસ કર્યો છે પરંતુ પબ્લિક બધું સમજે છે. કોંગ્રેસ ચૂંટણીઓમાં ખૂબ સારો દેખાવ કરીને સત્તા મેળવશે.