રાપરના  નાની રવ ગામના વતની ખોડા કાના રબારીએ પોલીસ ફરિયાદમાં જણાવ્યું કે તે અને તેના મોટા બાપુ મમુભાઈ રબારી સહિતના અન્ય પરિવારજનો ઘેટાં બકરાં થકી પશુપાલનનો વ્યવસાય કરે છે. અંદાજે ૬૦૦થી વધુ ઘેટાં બકરાંને રાપરના અલગ અલગ ગામના સીમાડે ચરાવે છે અને થોડાં દિવસો પૂરતો ત્યાં જ કામચલાઉ પડાવ નાખીને રહે છે. દિવસે સીમાડે માલ ચરાવે અને રાત પડે પડાવ પર પરત ફરે. રાતે પુરુષ સભ્યો વારાફરતી જાગીને માલની ચોકી કરે.

હાલ ખોડા રબારી સાથે તેના મોટા બાપુ મમુભાઈ, મમુભાઈના પત્ની સીતાબેન અને ૩૦ વર્ષિય દીકરો જોગાભાઈ સહિતના સાત-આઠ સગાં સંબંધીઓએ થોડાંક દિવસોથી ભોજનારી ડેમ વિસ્તારમાં પડાવ નાખ્યો છે. ગત રાતે દસેક વાગ્યા સુધી ખોડાએ ચોકી કરેલી અને પછી ઊંઘ આવતાં આંખો મીંચાઈ ગયેલી. મધરાતે બે અઢી વાગ્યે અચાનક બંદૂકનો ભડાકો થયેલો અને જોગાએ રાડારાડ કરતાં સૌ જાગી ગયેલાં. 

જોગાને જાગતો જોઈને એક જણે તેના પર બંદૂક ફોડી હતી. ફાયરીંગ બાદ બેઉ જણ નાસી ગયેલાં. ઘાયલ જોગાને 108 એમ્બ્યુલન્સ મારફતે સૌપ્રથમ રાપરની સરકારી હોસ્પિટલે ખસેડાયેલો. ઈજા ગંભીર હોઈ તેને ગાંધીધામની ખાનગી હોસ્પિટલમાં ખસેડાયો છે. રાપર પોલીસે ખોડા રબારીએ આપેલી ફરિયાદના આધારે બે અજાણ્યા યુવકો સામે ગુનો દાખલ કર્યો છે. પીઆઈ આર.એલ. ખટાણાએ હુમલાખોરોને ઝડપી પાડવા ગહન તપાસ હાથ ધરી છે.