કચ્છની તમામ છ વિધાનસભા બેઠકો, નગરપાલિકાઓ અને જિલ્લા પંચાયતમાં ઉગેલાં ‘કમળ’ સામે પશ્ચિમ છેવાડાની અબડાસા અને લખપત તાલુકા પંચાયતને ‘પંજા’ની પકડમાંથી મુક્ત કરવા ચૂંટણી જાહેર થાય તે પૂર્વે જ ભાજપે ચોકઠાં ગોઠવવાનું શરૂ કરી દીધેલું. ઘરને સાચવવા કોંગ્રેસના જિલ્લાસ્તરના આગેવાનો જ નહીં અમદાવાદથી ધારાસભ્ય ઈમરાન ખેડાવાલા અને ગ્યાસુદ્દીન શેખ કચ્છ દોડી આવેલાં. છેલ્લી ઘડીએ ‘ઘીના ઠામમાં ઘી ઢળી જવાની’ કોંગ્રેસને આશા હતી પરંતુ આજે ચૂંટણી ટાણે ‘ઘર કા ભેદી લંકા ઢાયે’ની આશંકા વાસ્તવિક્તામાં ફેરવાઈ ગઈ.

લખપત તાલુકા પંચાયતની ૧૬ બેઠકમાંથી ૯ બેઠક જીતીને અગાઉ કોંગ્રેસ સત્તા પર આવેલી. ૭ બેઠક સાથે ભાજપ વિપક્ષમાં બેઠેલો. જો કે, આજે પ્રમુખપદની ચૂંટણી ટાણે કોંગ્રેસના બે સદસ્યો ભચીબેન રબારી અને દિનેશ સથવારાએ ભાજપના ઉમેદવારની તરફેણમાં ક્રોસ વોટીંગ કરતાં ભાજપના ઉમેદવાર દયાબા જશુભા જાડેજા પ્રમુખપદે અને જુગરાજસિંગ સરદાર ઉપ પ્રમુખપદે ચૂંટાઈ આવ્યાં હતાં. કોંગ્રેસના ઉમેદવાર જેનાબેન પડીયારને ૭ મત મળ્યાં હતાં. ગઈકાલે ‘નો રીપીટ’ થીયરી પર પહેલાં પ્રમુખપદે સારાબાઈ કુંભારે ફોર્મ ભરેલું પરંતુ પાછળથી આગલી ટર્મના પ્રમુખ જેનાબેને પોતાને રીપીટ કરવા જીદ્દ પકડતાં તથા તેમની જીદ્દ ભારે પડી જવાની દહેશતથી કોંગ્રેસે જેનાબેનને મેન્ડેટ આપતાં જેનાબેને પણ પ્રમુખપદનું ફોર્મ ભર્યું હતું. કોંગ્રેસે સારાબાઈ કુંભારને તો મનાવી લીધાં પણ ધારણા મુજબ અન્ય બે સદસ્યોએ ક્રોસ વોટીંગ કરીને ખેલ પાડી દીધો.

અબડાસા તાલુકા પંચાયતની ૧૮ બેઠકો પૈકી ૧૦ બેઠકો સાથે સત્તાસ્થાને આવેલી કોંગ્રેસે આજે ત્રણ સભ્યોના બળવાથી સત્તા ગુમાવી છે. આજે પ્રમુખપદની ચૂંટણી ટાણે કોંગ્રેસના બે સભ્યો હુરબાઈ માંજોઠી અને મહાવીરસિંહ જાડેજાએ ભાજપના ઉમેદવારની તરફેણમાં ક્રોસ વોટીંગ કર્યું હતું જ્યારે શિવજીભાઈ મહેશ્વરી નામનો સભ્ય વ્હિપનો અનાદર કરીને ‘ઘેરહાજર’ રહ્યો હતો. જેથી પ્રમુખપદે ભાજપના મહાવીરસિંહ જાડેજા અને ઉપ પ્રમુખપદે રમીલાબેન ગજરા (ભાનુશાલી)નો બે મતની સરસાઈથી વિજય થયો હતો. ભાજપના ઉમેદવારને મળેલાં દસ મત સામે કોંગ્રેસના ઉમેદવારને સાત મત મળ્યાં હતાં.

જિલ્લા કોંગ્રેસના પ્રવક્તા પી.સી. ગઢવીએ ભાજપે સત્તાના જોરે કોંગ્રેસના સભ્યોને લલચાવી, ડરાવીને સત્તા મેળવી હોવાનો આરોપ કર્યો છે. જિલ્લા કોંગ્રેસ પ્રમુખ યજુવેન્દ્રસિંહ જાડેજાએ કોંગ્રેસ સાથે દ્રોહ કરનાર સભ્યો સામે પક્ષાંતર વિરોધી ધારાનું શસ્ત્ર ઉગામાશે તેમ જણાવી ભાજપે અબડાસા અને લખપતની જનતાએ કોંગ્રેસને આપેલા જનાદેશનો દ્રોહ કરી સત્તા મેળવી હોવાનો આરોપ કર્યો હતો.