ગત ૧૮ ઑગસ્ટથી અમૂલનું દહીં આરોગનાર લોકોને ઝાડા ઊલટી થવાના કેસ પ્રકાશમાં આવતાં ફૂડ વિભાગે વિવિધ તાલુકા અને શહેરોમાંથી દહીંના સેમ્પલ લેવાનું શરૂ કર્યું હતું. ત્રણેક દિવસ સુધી વિવિધ વિસ્તારોમાંથી ઝાડા ઊલટીના સામૂહિક દર્દીઓ નોંધાવાનું શરૂ થતાં જિલ્લામાં ભારે દેકારો મચી ગયો હતો.

ઘટનાના પગલે અમૂલ ડેરીએ દહીં ખાવાલાયક હોવાનો દાવો કરીને દહીંનો કેટલોક જથ્થો માર્કેટમાંથી પાછો ખેંચી લીધો હતો.ફૂડ વિભાગે એક-બે દિવસમાં દહીંના સેમ્પલનો રીપોર્ટ આવી જવાનું કહેલું પરંતુ ભેદી કારણોસર સવા મહિનાના વિલંબ બાદ આ રીપોર્ટ જાહેર કરાયો છે. ખોરાક અને ઔષધ નિયમન વિભાગના કચ્છના ડેઝિગ્નેટેડ ઑફિસર અમિત પટેલે જણાવ્યું કે જે જે સ્થળે લોકો બીમાર પડ્યાં તે સૌના કિસ્સામાં અમૂલનું દહીં ખાધું હોવાની બાબત એકસમાન હોઈ દહીંના સેમ્પલ મેળવાયેલાં. પરંતુ, તમામનો રીપોર્ટ નીલ આવ્યો છે.

જાહેર જનતાના આરોગ્ય સાથે ચેડાં સમાન આ ગંભીર ઘટનાનું ખરું કારણ શું હતું તે રહસ્ય કદાચ કાયમ માટે રહસ્ય જ બની રહેશે. બોલો, ભારત માતા કી જય.