મુખ્ય આરોપી મોહિત અંજાર રહેતા મિત્ર જયેશ જેન્તીલાલ ઠાકોર જોડે બાઈક પર ભુજ આવેલો. સાક્ષી પર હુમલા સમયે જયેશ વચ્ચે પડતા મોહિતે જયેશને પણ છરી મારેલી અને તે ઘાયલ થયેલો. હત્યા કેસમાં જયેશે મોહિતને મદદ કરી હોવાના આરોપ સાથે તેને સહ આરોપી બનાવાયો હતો.

♦ભુજ આવતા અગાઉ મોહિતે અંજારની એક દુકાનમાંથી છરી ખરીદેલી અને તે સમયે જયેશ સાથે હતો

♦બાઈક જયેશની માલિકીનું હતું

♦સાક્ષીએ મોહિતનો ફોન નંબર બ્લોક કરેલો હોઈ બનાવના દિવસે જયેશે તેના ફોન પરથી સાક્ષીને ત્રણથી ચાર ફોન કરેલાં.

♦બેઉ જણ ભુજની કોલેજમાં અંદર આવીને સાક્ષીનો ફોટો બતાવીને તેને શોધતા હતા. આમ, જયેશને પહેલાંથી જ મુખ્ય આરોપીના ઈરાદા અંગે જાણ હતી છતાં તેને ગુનો આચરવામાં સંપૂર્ણ મદદ કરી હતી.

સેશન્સ જજ દિલીપ પી. મહિડાએ બંને પક્ષના ધારાશાસ્ત્રીઓની દલીલો, તપાસકર્તા અધિકારીની એફિડેવીટ વગેરે જોઈ સરકારી વકીલની દલીલોને ગ્રાહ્ય રાખીને જયેશની અરજી ફગાવી દીધી છે. જો તેને જામીન પર છોડાય તો તે બહાર આવીને ગુનામાં પોતાની કોઈ ભૂમિકા નથી તેવું સાબિત કરવા ફરિયાદ પક્ષ અને સાક્ષીઓ પર દબાણ લાવવા પ્રયાસો કરી શકે છે તેની દહેશત વ્યક્ત કરીને કૉર્ટે ગુનાની ગંભીરતા અને સજાની જોગવાઈને અનુલક્ષીને અરજી ફગાવી દીધી છે.