પોલીસ સૂત્રોમાંથી મળતી પ્રાથમિક માહિતી મુજબ માંડવી તાલુકાના કોડાય ગામે રહેતા વિજય મનુભાઈ વૈષ્ણવ (ઉ.વ. ૪૭)ની તેમના પાર્ટનર પરિમલ બિહારીલાલ પંડ્યાએ ઘાતકી હત્યા કરી નાખી છે. બેઉ જણ પાણી પુરવઠા અને નર્મદા નિગમમાં સિવિલ કોન્ટ્રાક્ટર તરીકે ભાગીદારી પેઢી ધરાવતા હતા. બેઉ જણ વર્ષોથી એકમેકના ખાસ મિત્રો હતા અને કોડાય ગામે અડોશ પડોશમાં રહે છે.

રસ્તામાં બેઉ વચ્ચે નાણાંની લેતી દેતીના હિસાબ મામલે માથાકૂટ થઈ હતી. જેમાં ઉશ્કેરાઈને પરિમલ પંડ્યાએ ગઢશીશા રાજપર રોડ પર રાજપર ગામની સીમમાં નિર્જન ખેતર બાજુ વિજય વૈષ્ણવના ગળામાં છરી મારી હત્યા કરી દીધી હતી.

ઘટનાસ્થળ ગઢશીશા પોલીસ મથકની હદમાં આવતું હોઈ ગઢશીશા પોલીસ એક્શનમાં આવી હતી. પોલીસે સ્થળ પર દોડી જઈને વિજયના મૃતદેહને ગઢશીશા સામૂહિક આરોગ્ય કેન્દ્ર ખાતે મોકલી આપ્યો છે.

ગઢશીશાના પોલીસ ઈન્સ્પેક્ટર આર.બી. ટાપરીયા સહિતના સ્ટાફે બનાવ અંગે ફરિયાદ દાખલ કરવા તજવીજ હાથ ધરી છે. ગઈકાલે નખત્રાણાના વિગોડી ગામે બેકાર પુત્રએ કામધંધો કરવા ઠપકો આપતાં સગાં પિતાની હત્યા કરી નાખ્યાના બીજા દિવસે હત્યાનો બીજો બનાવ બહાર આવતાં પોલીસ ખાતામાં દોડધામ મચેલી રહી છે.