૫મી સપ્ટેમ્બર, શનિવારના રોજ જખૌના નલિયા રોડ પર ઓધવરામ ગેટ પાસે બાવળની ઝાડીમાં અજાણ્યા યુવકની લાશ પડી હોવાની સવારે ૯.૩૦ કલાકે પોલીસને જાણ થયેલી. પોલીસે મરનાર યુવકની ડૅડબોડીને જામનગરમાં ફોરેન્સિક ઑટોપ્સી માટે મોકલી આપીને તપાસ હાથ ધરી હતી.

મરનાર યુવકની કમરે માછીમારો પહેરે છે તેવી ખાસ દોરી બાંધેલી હતી. જેથી મરનાર માછીમાર હોવાની ધારણા પર પોલીસે તપાસ હાથ ધરી હતી પરંતુ મરનારની ઓળખ પ્રસ્થાપિત થઈ નહોતી.

SOGના ASI જોરાવરસિંહ જાદવને બાતમી મળેલી કે ત્રીજી સપ્ટેમ્બરના રોજ જખૌમાં એક ચાની હોટેલ પર બે યુવકો ઝઘડતાં હતા અને બેઉ જામનગર બાજુના માછીમારો હતા. આ બાતમીના આધારે પોલીસે મત્સ્યોદ્યોગ વિભાગની ટોકન મેનેજમેન્ટ સિસ્ટમની મદદથી જખૌ કાંઠે માછીમારી કરવા આવેલા દ્વારકાના ઓખાના માછીમારોની વિગતો મેળવી હતી.

ટોકનના આધારે મરનાર ઓખાનો માછીમાર ઓસમાણ ઉમર કેર (ઉ.વ. ૩૫) હોવાનું સ્પષ્ટ થયેલું. ઓસમાણ અને તેનો મિત્ર હાજી જુમા સીદી બેઉ એક જ ગામમાં રહેતા, બંને નાનપણથી એકમેકના મિત્રો હતા અને સાથે માછીમારી કરતા. પોલીસે જુમા સીદીની અટક કરી પૂછપરછ કરતાં તેણે જ મિત્ર ઓસમાણની હત્યા કરી હોવાનું કબૂલ્યું છે.

ઘટના અંગે મર્ડરનો ગુનો દાખલ કરાયો છે અને આરોપીની અટક કરી રિમાન્ડ મેળવવા જખૌ PSI આર.જે. ગોહિલે તજવીજ હાથ ધરી છે.