માધાપરની આ સોસાયટીમાં છેલ્લાં પાંચ-છ માસથી ઉત્તરપ્રદેશનું એક યુગલ બે વર્ષની બાળકી સાથે રહેવા આવેલું. પતિ ટ્રક ડ્રાઈવીંગ કરે છે. થોડાંક દિવસો બાદ અવારનવાર ઘરના બંધ દરવાજા પાછળથી પડોશીઓને માસૂમ બાળકીની દર્દનાક ચીસો અને રૂદનના અવાજો સંભળાવા માંડ્યા હતા. પડોશીઓ પૂછે તો માતા ‘મેરી બેટી હૈ, મેં ઔર મેરા શૌહર જો ચાહે કરેં, આપ કો ક્યા?’ કહીને મોઢું તોડી લેતી.

બુધવારની બપોરે બે વાગ્યાના અરસામાં તો જાણે હદ થઈ ગઈ. માસૂમ દીકરીના ચિત્કારો સાંભળીને પડોશીઓથી રહેવાયું નહીં. સૌએ એકઠાં થઈને ઘરનો દરવાજો ખોલ્યો તો અંદર માસૂમ બાળકી ઈજાગ્રસ્ત હાલતમાં અસહ્ય પીડાથી રડતી કણસતી જોવા મળેલી. પડોશીઓએ પોલીસને જાણ કરતાં માધાપરના મહિલા પીઆઈ એ.કે. જાડેજા તેમની ટીમ સાથે પહોંચી ગયાં. બાળકીને જોઈને જ સૌ પામી ગયાં કે દીકરી પર અસહ્ય ત્રાસ ગુજારાયો છે. તેને તત્કાળ એમ્બ્યુલન્સમાં જી.કે. જનરલ હોસ્પિટલમાં સારવાર માટે ખસેડાઈ.

બાળકીની હાલત જોઈને સારવાર કરનાર નર્સો અને તબીબોના હાથ પણ ધૃજી ઉઠ્યાં. બાળકીને જમીન પર સૂવડાવીને થાપા અને પીઠમાં ઠેર ઠેર બીડીના ડામ અપાયેલાં. થાપા અને હોઠ પર બચકાં ભરાયેલાં. માતાએ બાળકીનું માથું દિવાલમાં ભટકાવતાં કપાળના ભાગે હેમરેજ થઈ ગયેલું. બાળકી હાલ હોસ્પિટલમાં સારવાર હેઠળ છે.

ઘટના અંગે પડોશમાં રહેતી મહિલાએ હિંમતપૂર્વક બાળકીના માતા પિતા સામે ફરિયાદ નોંધાવી છે. ગુનાની તપાસ કરી રહેલાં પીઆઈ એ.કે. જાડેજાએ જણાવ્યું કે બાળકીની માતાએ બીજા લગ્ન કરેલાં છે. આગલા પતિથી તેને ત્રણ બાળકીઓ થયેલી છે. બે મોટી બાળકીઓ યુપીમાં મહિલાની માતા પાસે રહે છે અને ત્રીજી સૌથી નાની બાળકીને તે સાથે લઈને આવી છે. તેના પતિને પણ અગાઉના લગ્નથી ત્રણ સંતાનો છે અને આગલા ઘરની પત્ની-બાળકો સૌ યુપી રહે છે.

પોલીસે યુગલ વિરુધ્ધ સગી દીકરીની હત્યાના પ્રયાસ, પોક્સો એક્ટની કલમ ૯ (એમ) (એન) (આર) તથા ૧૦ તેમજ બાળ ન્યાય બાબત અધિનિયમની કલમ ૭૫ હેઠળ ગુનો નોંધીને બેઉની ધરપકડ કરી લીધી છે.