૨૫ જાન્યુઆરીના રોજ હનીફ અને તેના ભત્રીજા હાફિઝ સહિતના ૨૧ લોકોએ કાવતરું ઘડીને, ગેરકાયદે મંડળી રચી પ્રાણઘાતક હથિયારો ધારણ કરી, માટીના પાળાના લીધે પોતાનો રસ્તો અવરોધાતો હોવાના મુદ્દે વિરોધ કરનાર સગાં ભાઈઓ પર ઘાતક હુમલો કર્યો હતો.

અલ્તાફની ફરિયાદના પગલે લોકલ ક્રાઈમ બ્રાન્ચે અગાઉ હનીફના ભત્રીજા હાફિઝ કાસમ પડયાર સહિત આઠ આરોપીની ૩૦ જાન્યુઆરીના રોજ ધરપકડ કરી હતી. પરંતુ હનીફ અને ભુટો આજ દિન સુધી નાસતાં રહ્યાં છે. આ ગુનામાં આરોપીઓ સામેની તપાસ પૂરી કરીને પોલીસે કૉર્ટમાં ચાર્જશીટ રજૂ કર્યાં બાદ હમીદ હિંગોરા સિવાયના અન્ય સાત આરોપીએ ભુજ સેશન્સ કૉર્ટમાં નિયમિત જામીન મેળવવા જુદી જુદી બે અરજીઓ દાખલ કરી હતી.

બચાવ પક્ષે રજૂઆત કરેલી કે અગાઉ ઝડપાયેલાં આરોપીઓ સામે પોલીસની તપાસ પૂરી થઈ ગઈ છે અને ચાર્જશીટ કરી દેવાઈ છે ત્યારે હવે આ ગુનામાં હનીફ અને ભુટાની હાજરી તપાસ માટે જરૂરી નથી રહી. જો કે, પ્રોસિક્યુશન તરફે જિલ્લાના મુખ્ય સરકારી વકીલ એચ.બી. જાડેજાએ રજૂઆત કરેલી કે ગુનામાં હનીફની સક્રિય સંડોવણી રહેલી છે અને તે મુખ્ય આરોપી છે. બનાવ સ્થળે તેની હાજરી હતી. તપાસ માટે તેનું કસ્ટોડિયલ ઈન્ટરોગેશન જરૂરી છે.

એ જ રીતે, ગુનામાં ભુટાએ મુખ્ય આરોપીની મદદગારી કરેલી છે. તેથી જો તેમને જામીન પર છોડાય તો તેઓ પુરાવા સાથે ચેડાં કરી શકે છે અને તપાસમાં સહકાર નહીં આપે. છઠ્ઠા અધિક સેશન્સ જજ વિરાટ એ. બુધ્ધે ગુનામાં હનીફની સક્રિય સંડોવણી, ગુનાની ગંભીરતા, ગુનાહિત વર્તણૂક અને ગુનાહિત ભૂતકાળ, આરોપીઓ સામેની શિક્ષાત્મક જોગવાઈઓ તથા સમાજ પર પડનારી દૂરોગામી અસરોને અનુલક્ષીને બેઉની અરજી ફગાવી દીધી છે.