કૉર્ટે ઉમેર્યું કે નશાનું દૂષણ વ્યક્તિગત સ્તરે નહીં પણ રાષ્ટ્રીય સ્તરે સંકટ બની શકે તેમ છે અને તે દેશની આંતરિક સુરક્ષાને સીધી અસર કરે છે. સજા પામનારાં તમામને કૉર્ટે વ્યક્તિદીઠ બે-બે લાખનો દંડ ફટકાર્યો છે.

પાકિસ્તાની ડ્રગ્ઝ માફિયા હાજી હસન અને હાજી હાસમ કરાચીથી હેરોઈનનું કન્સાઈન્મેન્ટ જળમાર્ગે જખૌ નજીક ભારતમાં સપ્લાય કરવાના હોવાની ગુજરાત ત્રાસવાદ વિરોધી દળના તત્કાલિન DySP ભાવેશ પી. રોજીયાને બાતમી મળેલી. બાતમીના પગલે ATSએ ભારતીય કોસ્ટગાર્ડની મદદથી જખૌ નજીક આંતરરાષ્ટ્રીય જળસીમામાં વૉચ ગોઠવેલી.

બોટમાં ડ્રગ્ઝ માફિયા હાજી હસનનો પુત્ર સાજીદ અને જમાઈ ઈમરાન તારીક વાધેર સહિત ૬ પાકિસ્તાની સવાર હતા. પાકિસ્તાનીઓ VHF પર હરી-1 અને હરી-2 કોડવર્ડથી ભારતીય બોટનો સંપર્ક કરી હેરોઈન ડિલિવર કરવાના હતા. જો કે, ATS અને કોસ્ટગાર્ડની સંયુક્ત ટીમે બોટ સાથે તમામ પાકિસ્તાની કેરિયર્સને રંગેહાથ ઝડપી પાડ્યાં હતા. બોટમાંથી ૩૮૪ કરોડ ૬૮ લાખની કિંમતનું ૭૬ કિલો ૯૩૬ ગ્રામ હેરોઈન મળી આવ્યું હતું. બનાવ અંગે આરોપીઓ સામે ATS પોલીસ સ્ટેશનનમાં ગુનો નોંધવામાં આવ્યો હતો.

આ ગુનામાં ૪ વર્ષ અને ૪ મહિના બાદ ભુજની વિશેષ NDPS કૉર્ટના સ્પેશિયલ જજ વિરાટ એ. બુધ્ધે આજે તમામ ૬ પાકિસ્તાનીને NDPS Actની કલમ ૮ (સી), ૨૨ (સી), ૨૩ (સી), ૨૫ અને ૨૯ હેઠળ દોષી ઠેરવી ૨૦ વર્ષની સખ્ત કેદની સજા અને પ્રત્યેકને બે-બે લાખનો દંડ ફટકાર્યો છે.

ગુનો બન્યો ત્યારથી જ તમામ આરોપી જેલમાં કેદ છે. આ કેસમાં ATS તરફે મુખ્ય જિલ્લા સરકારી વકીલ એચ.બી. જાડેજાએ દલીલો કરી હતી.

(૧) મોહમદ ઇમરાન મોહમ્મદ તારીક વાઘેર (ઉં.વ. ૩૧)

(ર) દાનિસ મોહમ્મદ હુસેન કચ્છી વાઘેર (ઉં. વ. ર૪)

(૩) સાગર મોહમ્મદ કચ્છી વાઘેર (ઉં.વ. ર૩)

(૪) ઇસ્માઇલ ઇબ્રાહિમ બડાલા (ઉં. વ. ૭પ)

(પ) મોહમદ સાજીદ મોહમ્મદ હુસેન યાકુબલાલા કુંગરા (ઉ. વ. ર૪)

(૬) અશ્ફાક મોહમ્મદ ઇશાક વાઘેર (ઉ.વ. ર૬) (તમામ રહે. કરાચી)

કૉર્ટે ચુકાદો આપતાં જણાવ્યું કે ઝડપાયેલો ડ્રગ્ઝનો જથ્થો ફક્ત કૉમર્સિયલ ક્વૉન્ટિટી જ નથી પરંતુ સમાજના આરોગ્ય, સલામતી અને ભવિષ્ય માટે ઘાતક થતી એક અત્યંત ગંભીર માત્રા છે. આરોપીઓ દ્વારા વિશાળ પ્રમાણમાં ભારતમાં નશીલા પદાર્થોની ગેરકાયદે રીતે આવક જાવક કરવાની પ્રવૃત્તિ એ સુનિયોજિત અને સચેતન રીતે ઘડવામાં આવેલું કાવતરું છે, જેનો સીધો પ્રભાવ દેશના યુવાનો પર પડે છે.

આ ગેરકાયદેસર પ્રવૃત્તિઓ દ્વારા મળતાં નાણાંનો ઉપયોગ દેશવિરોધી પ્રવૃત્તિઓને પ્રોત્સાહન આપવા માટે થાય છે, જે દેશની આંતરિક સુરક્ષાને સીધી અસર કરે છે. ત્યારે, આવા દેશવિરોધી કૃત્યને જરાપણ હળવાશથી લઈ શકાય તેમ નથી.

આ કઠોર સજા ફટકારી અદાલત એ સ્પષ્ટ સંદેશ આપે છે કે નશીલા પદાર્થોની હેરાફેરી, ખાસ કરીને વિદેશી તત્વો દ્વારા સંચાલિત, કોઈપણ સંજોગોમાં સહન કરવામાં આવશે નહીં.