ભુજપુર ઓપીના જમાદાર એએસઆઈ લાલજીભાઈ ચાડે ફરિયાદમાં જણાવ્યું કે રાત્રે પોણા દસ વાગ્યાના અરસામાં પેટ્રોલીંગમાં હતા ત્યારે લેબર કોલોનીમાં એક મજૂરે આપઘાત કર્યો હોવાની જાણ થતાં તે સ્થળ પર પહોંચેલાં. પોલીસ પહોંચી ત્યારે સિક્યોરીટી સ્ટાફ અને એક એમ્બ્યુલન્સ ત્યાં હાજર હતા.

વિરોધ કરી રહેલાં મજૂરોનું ટોળું જોઈને લાલજીભાઈએ પીએસઆઈ એન.પી. ગોસ્વામીને જાણ કરતાં તેઓ સરકારી જીપ લઈને અન્ય ચાર પોલીસ કર્મચારીઓ સ્થળ પર દોડી આવ્યાં હતા. અન્ય બે પોલીસ કર્મચારી પણ સ્થળ પર દોડી આવેલાં. પોલીસે એકાદ હજાર મજૂરોના ટોળાંના વિરોધ વચ્ચે જેમ તેમ કરીને લાશને નીચે ઉતારીને ગેટ પર ઊભેલી એમ્બ્યુલન્સમાં રવાના કરેલી.

લાશને રવાના કર્યાં બાદ પોલીસ પણ જીપમાં બેસી રવાના થયેલી. ત્યારે ઉશ્કેરાયેલાં ટોળામાંથી અમુક લોકોએ ‘હમારી ના કેહને પર ભી પુલિસ ક્યું લાશ લે કે ચલી ગઈ? અભી પુલિસ કો જાને મત દો, પુલિસ કો મારો’ કહીને જીપમાં બેસી જઈ રહેલી પોલીસને નિશાન બનાવી પથ્થરમારો શરૂ કર્યો હતો. કેટલાંકે ધોકા લઈને જીપમાં તોડફોડ કરેલી.

હુમલામાં તમામ ૯ પોલીસ કર્મચારીઓને નાની મોટી ઈજાઓ પહોંચી છે. ઘટના બાદ સમગ્ર જિલ્લાના વિવિધ પોલીસ મથકની ટીમોને કોલોનીમાં ઉતારીને કોમ્બિંગ હાથ ધરાયું હતું.

ટોળાં સામે પોલીસની ફરજમાં રૂકાવટ કરી, પોલીસને નાની મોટી ઈજા પહોંચાડી, સરકારી વાહનમાં તોડફોડ કરી ૫૦ હજારનું નુકસાન કરવા અંગેની પણ કલમો લગાડાઈ છે.