વેપારીએ ખંડણી આપવા ઈન્કાર કરતા બાપટે પત્રકારના નામે ફરતાં તેના બે માણસોને વેપારીના ધંધાના સ્થળે મોકલી મારકૂટ કરાવી ૪૫ હજારની લૂંટ કરાવી હતી. જો કે, વેપારી પણ માથાનો નીકળ્યો. બાપટના એક માણસને પકડીને સરખો કૂટી નાખી બાપટની ખંડણી લીલાની કહાણીનું વીડિયો રેકોર્ડીંગ કરી લઈ તેને પોલીસ હવાલે કરાવી ચાર સામે પ્રાગપર પોલીસ મથકે ફરિયાદ નોંધાવી છે.

આદિપુરમાં રહેતા ૫૦ વર્ષિય અબ્દુલા ગફૂર હાલેપોત્રા ટ્રાન્સપોર્ટની સાથે ગુંદાલા સીમમાં પ્લાસ્ટિકના ખાલી ઓઈલ બેરલ ગાંધીધામથી મગાવી સાફ કરીને વેચવાનો ધંધો કરે છે. ગત ૨૫ એપ્રિલના રોજ વવાર ગામનો માણેક ગઢવી નામનો શખ્સ અબ્દુલાને રૂબરૂ મળવા આવેલો અને સંજય બાપટનો નંબર આપી ફોન પર વાત કરવા જણાવેલું. અબ્દુલાએ બીજા દિવસે બાપટ જોડે મોબાઈલ વોટસએપ પર કૉલ કરતા બાપટે તેને પોતાની ઑફિસે રૂબરૂ મળવા બોલાવેલો.

માણેક ગઢવી અવારનવાર અબ્દુલાને રૂબરૂ મળી અથવા ફોન કરી હપ્તા માગતો રહેતો.

ગત બુધવારે સંજય બાપટે અબ્દુલાને ફોન કરીને જણાવેલું કે ‘મેં મારા ઘરે નવું એસી લગાડેલું છે, જેની કિંમત ૩૫ હજાર રૂપિયા થઈ છે. હું કહું તે દુકાનવાળાને રૂપિયા આપી દેજે’ અબ્દુલાએ રૂપિયા આપવા ના પાડતાં બાપટે ધમકી આપતા જણાવેલું કે ‘મારે તને વારંવાર કહેવાનું ના હોય, તારે ધંધો કરવો હોય તો મને રૂપિયા આપવા પડશે. હું બધી જગ્યાએથી રૂપિયા લઉં છું, નહીં આપે તો તારો ધંધો ચાલવા નહીં દઉં. એક દિવસ રાહ જોઈશ નહીંતર તારી જગ્યા પર મારાં માણસો મોકલીશ’

અબ્દુલાએ રૂપિયા ના આપતા બાપટે મુંદરામાં પત્રકાર બનીને ફરતાં આરીફ કાસમ ખલીફા અને હરિ સુમાર ગઢવીને ગઈકાલે તેના ધંધાના સ્થળે મોકલેલાં. બેઉ જણ બુલેટ લઈને આવેલા. બેઉ જણે બેરલ સાફ કરી રહેલા મનોહરસિંહ સોઢા અને અવિનાશ નામના કર્મચારીઓ જોડે ઝઘડો, મારકૂટ કરેલી.

મજૂરોએ આરીફને સરખો કૂટી નાખેલો. પોતાને અને હરિ ગઢવીને સંજય બાપટે મોકલ્યાં હોવાની આરીફની કબૂલાતનું વીડિયો રેકોર્ડીંગ કરીને અબ્દુલા તેને પોલીસ સ્ટેશને લઈ ગયો હતો. બનાવ અંગે પ્રાગપર પોલીસે સંજય બાપટ, માણેક ગઢવી, હરિ ગઢવી અને આરીફ ખલીફા વિરુધ્ધ લૂંટ, ખંડણીની માંગણી સહિતની કલમો તળે ગુનો દાખલ કરીને સંજય બાપટ, આરીફ અને માણેક ગઢવીની ધરપકડ કરી લીધી છે.

બીજી તરફ, આરીફ ખલીફાએ ઓઈલ ચોરીનું રેકેટ ચાલતું હોવાની આશંકાએ સમાચાર માટે વીડિયો રેકોર્ડીંગ કરતા હતા ત્યારે ગફુર સહિતના માણસોએ પકડીને મારકૂટ કરી પરાણે ખોટી કબૂલાત કરાવતો વીડિયો રેકોર્ડ કર્યો હોવાની વળતી ફરિયાદ નોંધાવી છે.

આમ આદમી પાર્ટીમાં અગાઉ મહામંત્રી રહી ચૂકેલા સંજય બાપટ સામે અગાઉ લેન્ડગ્રેબિંગ સહિતની ફરિયાદો નોંધાયેલી છે. આખું મુંદરા બાપટની કરમકુંડળીથી સુપેરે વાકેફ છે. કચ્છમાં આમ આદમી પાર્ટીમાં ડૉ. કાયનાત અન્સારી, ડૉ. નેહલ વૈદ્ય, સીએ કૈલાસદાન ગઢવી કે પ્રદેશ સ્તરે પૂર્વ પત્રકાર ઈશુદાન અને ગોપાલ ઈટાલિયા જેવા સુશિક્ષિત અને સ્વચ્છ પ્રતિભા ધરાવતાં લોકો સંકળાયેલા છે ત્યારે ગુનાહિત ઈતિહાસ અને માનસિક્તા ધરાવતાં લોકોથી પાર્ટીની ઈમેજને કલંક લાગી રહ્યું હોવાનું પણ ચર્ચાઈ રહ્યું છે.