વાંકી ગામે રેવન્યૂ સર્વે નંબર ૩૬૮ની ૨૨ એકર ૪ ગુંઠા જમીન વાંકી ગામે રહેતા જોહરાબાઈ અમીરઅલી ખોજા, અમીન અમીરઅલી ખોજા, ઈરફાન અમીરઅલી ખોજા, કરિશ્મા અમીરઅલી ખોજાના નામે નોંધાયેલી છે. પત્રીની વેજીએ ખોજા પરિવારને ૩૦ લાખ રોકડાં અને ૧ લાખનો ચેક આપીને ૧૬-૦૭-૨૦૨૫ના રોજ પોતાના નામે નોટરાઈઝ્ડ સાટા કરાર કરાવ્યો હતો. આ જમીન ખરીદવામાં ફરિયાદીને રસ હોઈ તે વેજીને મળેલો. વેજીએ પોતે કહે તેને ખોજા પરિવાર જમીનના વેચાણ દસ્તાવેજ લખી આપશે તેમ કહીને જમીન વેચાણમાં રસ દર્શાવેલો.

ફરિયાદી અને વેજી વચ્ચે પ્રતિ એકરની કિંમત ૧૩ લાખ પેટે ૨ કરોડ ૮૬ લાખ ૨૫ હજારમાં સોદો નક્કી થયેલો. ફરિયાદીએ વેજીને બાના પેટે ૪૦ લાખ રોકડાં આપીને સાટા કરાર લખાવી લીધેલો.

ફરિયાદીએ પોતાના મિત્ર ધીરુભા જાડેજા સાથે આ જમીન પાર્ટનરશીપમાં ખરીદવાનું નક્કી કરેલું. સોદા પેટે તેમણે ઇરફાનની માંગણી મુજબ તેને ૪.૫૦ લાખના ૪ ચેક લખી આપેલાં. ૮ જાન્યુઆરી ૨૦૨૬ના રોજ દસ્તાવેજ માટે ટોકન લેવાનું નક્કી થયેલું. ઈરફાન આગલા દિવસે ભુજમાં આવીને ફરિયાદી પાસેથી રોકડાં અને ચેકમાં થોડાંક રૂપિયા લઈ ગયેલો.

જે દિવસે ટોકન મેળવેલો તે જ દિવસે છાપામાં છપાયેલી જાહેર નોટિસ વાંચીને ફરિયાદી ભડક્યો હતો. ઈરફાનની ફોઈ દિલશાદબેને આ જમીન વડીલોપાર્જીત હોવાનું અને તેમાં પોતાના વારસાઈના હક્કો હોવાનું જાહેર કરીને જોહરાબાઈ પોતાના હક્કો ડૂબાડીને જમીન વેચસાટ કરવાનો પ્રયાસ કરી રહી હોવાનો અને જે કોઈ જમીન અંગે વ્યવહાર કરશે તેની સામે ફોજદારી ફરિયાદ નોંધાવવાની ચીમકી અપાઈ હતી.

ફરિયાદીએ આ અંગે ઈરફાનને વાત કરતાં તેણે ચિંતા ના કરવા અને પોતે ફોઈ જોડે મામલો સેટલ કરી દેશે તેમ કહીને દસ્તાવેજની બીજી તારીખ મેળવવા જણાવેલું. થોડાંક દિવસો સુધી વાયદાબાજી કર્યાં બાદ ઈરફાન ફરિયાદીને ભુજમાં રૂબરૂ મળીને જમીન દસ્તાવેજ લખી આપવાની ખાતરી આપીને પાંચ લાખ લઈ ગયેલો. ફેબ્રુઆરીમાં ઈરફાને ફોઈ જોડે સમાધાન થઈ ગયું હોવાનું જણાવી, ફરિયાદીને વિશ્વાસમાં લઈને વધુ ૮.૫૦ લાખ તથા ૪૯૧ લાખ મેળવેલાં.

સમગ્ર સોદા દરમિયાન વેજીબેન પણ ઈરફાનની જેમ ફરિયાદીને વાયદાઓ આપતી રહેલી. ફરિયાદીએ જે નાણાં ચૂકવેલાં છે તેના ચેક, રસીદો અને બેન્ક ખાતાંની વિગતોના પુરાવા પોલીસને આપ્યાં છે. પ્રાગપર પોલીસે વિશ્વાસઘાત અને છેતરપિંડીની કલમો તળે ગુનો દાખલ કરીને તપાસ હાથ ધરી છે.