મરણ જનાર ઝુલેખા ખાન મૂળ બિહારની વતની છે અને ગાંધીધામના ઈન્દિરાનગરમાં રહીને ઋચિ સોયા કંપનીમાં મજૂરી કરે છે. નિત્યક્રમ મુજબ ઝુલેખા આજે સવારે ૯ વાગ્યે એકલી પગપાળા કંપનીમાં કામે જવા નીકળી હતી. મચ્છુનગર રેલવે ફાટક નજીક એકાદ કિલોમીટર લાંબી બાવળની ગાઢ ઝાડીઓ વચ્ચેની કેડી પરથી તે જતી હતી ત્યારે અજાણ્યો યુવક કાળ બનીને ત્રાટક્યો હતો.

સવારે ૧૧.૩૦ના અરસામાં બાવળની ઝાડીમાંથી ઝુલેખાનો મૃતદેહ મળ્યો હતો. શરીર પરના લુગડાં બાજુમાં પડ્યાં હતા અને આંતરવસ્ત્રો પહેરેલી હાલતમાં ડેડબૉડી પડેલી જોઈને કોઈ નરાધમે દુષ્કર્મ આચર્યું હોવાની સૌ કોઈને આશંકા ઘેરી બની હતી. ઘટનાની જાણ થતાં જ બી ડિવિઝન પીઆઈ એસ.વી. ગોજીયા સાથે પોલીસ કાફલો સ્થળ પર દોડી ગયો હતો.

લોકલ ક્રાઈમ બ્રાન્ચની ટીમ તપાસમાં જોડાઈ હતી. વિવિધ પોલીસ ટીમ બનાવાઈને દરેકને જુદા જુદા ટાસ્ક અપાયાં હતા. પોલીસે આસપાસના વિસ્તારના સીસીટીવી ફૂટેજ ચેક કરતાં ઘટનાસ્થળે જે ગમછો પડ્યો હતો તેવો ગમછો ધારણ કરેલો એક શખ્સ ઝાડી તરફ જતો જોવા મળ્યો હતો. ગણતરીના કલાકોમાં જ પોલીસે સીસીટીવીમાં દેખાયેલાં આરોપીને દબોચી લીધો હતો.

ગમછાથી ગળેટૂંપો આપી મહિલાની હત્યા કરાઈ હોવાનું સ્પષ્ટ થયાં બાદ તેના પુત્રએ આરોપી સામે હત્યાની કલમ તળે ગાંધીધામ બી ડિવિઝન પોલીસ મથકે ફરિયાદ નોંધાવી છે.

ફોરેન્સિક ઑટોપ્સી માટે મહિલાના મૃતદેહને જામનગરની મેડિકલ કૉલેજ મોકલવા તજવીજ હાથ ધરાઈ છે.