પેઢીના બેન્કિંગ, ફિલ્ડ વર્ક માટે છેલ્લાં બે વર્ષથી તેમની પાસે અભિષેક બ્રિજેન્દ્ર શર્મા અને તેનો સગો ભાઈ રિષભ કામ કરે છે. ફરિયાદીની કંપનીએ મુંબઈની કંપની પાસેથી સ્ટીલ પાઈપ ખરીદયા હોઈ તે કંપનીમાં એડવાન્સ પેમેન્ટ જમા કરાવવાનું હતું.

બુધવારે બેઉ ભાઈ શેઠ પાસે ચેક લેવા રૂબરૂ આવેલાં. ફરિયાદીએ આઠ કોરાં ચેક પર સહી કરીને તમામ ચેક અભિષેકને આપી દીધેલાં. બીજા દિવસે કામ અર્થે ફરિયાદી અમદાવાદ નીકળી ગયો હતો. ગઈકાલે શુક્રવારે મુંબઈની કંપનીને એડવાન્સ પેમેન્ટ કરવાનું હોઈ ફરિયાદીએ અભિષેકને ફોન કરીને નાણાં ટ્રાન્સફર કરવા જણાવેલું. અભિષેકે બેન્કમાં જઈ ચેક મારફતે નાણાં ટ્રાન્સફર કરેલાં અને તેનો મેસેજ પણ ફરિયાદીને મળ્યો હતો.

મુંબઈની કંપનીને પેમેન્ટ થઈ ગયું હોવાનું માનીને ફરિયાદીએ કંપનીને પેમેન્ટ મોકલી દીધું હોવાનું જણાવેલું. જો કે, એકાદ કલાક બાદ મુંબઈની કંપનીએ જણાવેલું કે પેમેન્ટ મળ્યું નથી. ફરિયાદીએ તપાસ કરતા નાણાં તેમના બેન્ક ખાતામાંથી રિષભ એન્ટરપ્રાઈઝમાં ટ્રાન્સફર થયેલાં. ફરિયાદીએ અભિષેકને ફોન કરીને આ બાબતે પૂછતાં અભિષેકે નાણાં ભૂલથી રિષભના બેન્ક ખાતામાં જમા થઈ ગયાં હોવાનું જણાવેલું. ફરિયાદીએ આ નાણાં તત્કાળ પોતાના બેન્ક ખાતામાં ટ્રાન્સફર કરવા જણાવેલું. પરંતુ, અભિષેકે નાણાં ટ્રાન્સફર કરાવ્યાં નહોતા.

ફરિયાદીએ સાંજ સુધી વારંવાર ફોન કરીને અભિષેકને નાણાં ટ્રાન્સફર કરાવવા જણાવેલું પરંતુ અભિષેક દર વખતે ખોટાં બહાના આપતો હતો અને પછી તેણે ફોન ઉપાડવાનું બંધ કરી દીધેલું. તેનો ભાઈ રિષભ પણ શેઠના ફોન ઉપાડતો નહોતો.

જેના પગલે મોડી રાત્રે ફરિયાદીએ પોલીસ મથકે જઈ બેઉ ભાઈ વિરુધ્ધ વિશ્વાસઘાત છેતરપિંડીની ફરિયાદ નોંધાવી છે.