ધર્માણીએ જણાવ્યું કે ગઈકાલે બપોરે પોણા બે વાગ્યે શિક્ષણ કાર્ય પૂરું થઈ ગયા બાદ તે કાર પાર્કિંગ તરફ જતા હતા ત્યારે રાજવીર સહિત પાંચ છ વિદ્યાર્થીઓનું ગૃપ યુનિફોર્મ વગર ત્યાં બેઠું હતું. આ છાત્રોને અગાઉ પણ યુનિફોર્મ પહેર્યાં વગર કોલેજમાં ના આવવા તાકીદ કરાયેલી. આચાર્યએ આ વિદ્યાર્થીઓને ફરી યુનિફોર્મ પહેરીને જ કોલેજમાં આવવા તાકીદ કરી શિક્ષણ કાર્ય પૂરું થઈ ગયું હોઈ ઘરે જવા જણાવ્યું હતું.

આચાર્ય આ યુવકોને સૂચના આપતા હતા ત્યાં સેકન્ડ યર બીએનો વિદ્યાર્થી રાજવીરસિંહ એમ. ચાવડા તાડુકીને બોલ્યો હતો કે સાહેબ, બે દિવસ અગાઉ કોલેજના બગીચામાં હું બેન્ચ ઉપર બેઠેલો ત્યારે તમે મને સરખો બેસવા જણાવી જાહેરમાં મારું અપમાન કરેલુ તે બદલ તમારે મારી માફી માગવી પડશે, કારણ કે તમે મારી ઈમેજ બગાડી છે.

આમ કહીને અચાનક જ તેણે આચાર્યને જોરદાર ફડાકો ઝીંકી દીધી હતો. અચાનક હુમલાના કારણે આચાર્યને તમ્મર આવી ગયા હતા અને બાદમાં તે ત્યાંથી જતા રહ્યા હતા. આ લુખ્ખાગીરીની જાણ થતાં આજે સવારે કોલેજના છાત્રો અને અધ્યાપકોનો રોષ ફાટી નીકળ્યો હતો.

કોલેજના છાત્રોએ રાજવીર અને આ રીતે લાંબા સમયથી દાદાગીરી કરી રંજાડતા તેના ગૃપના છાત્રોને કોલેજમાંથી રસ્ટીકેટ કરી દેવા માંગણી કરી છે.