આદિપુર પોલીસ ધીરજપૂર્વક હ્યુમન અને ટેકનિકલ સર્વેલન્સથી સલિના અને તેના સંપર્કમાં રહેલાં લોકો પર ગુપ્ત નજર રાખીને બેઠી હતી. ચોરીના બનાવને પાંચ મહિના વીતી જતાં લોકો ભૂલી ગયાં હશે તેમ માનીને સલિના તેની સહેલી રવિના જોડે ફરી ગાંધીધામ આદિપુરની અલગ અલગ સોસાયટીઓમાં કામ કરવા માટે ઘર શોધવા આવી હતી. બાતમી મળતાં જ આદિપુર પોલીસે જુદી જુદી ટીમો બનાવીને સલિનાને તેની સહેલી સાથે ઝડપી પાડી છે.

૨૬ વર્ષની સલિના અને ૨૮ વર્ષની રવિના બેઉ નેપાળની વતની છે. બેઉ જણી વિવિધ શહેરોના પોશ વિસ્તારોમાં આવેલા માલદાર લોકોના બંગલાઓમાં કામવાળી બાઈ તરીકે કામે લાગતી. પરિવારનો વિશ્વાસ જીતતી. સૌ સદસ્યોની વિગતોથી વાકેફ થઈ તેમની ગતિવિધિ પર નજર રાખતી. લાગ મળ્યે ઘરની માલમતા સાફ કરીને ફ્લાઈટ પકડીને તે શહેરમાંથી નાસી છૂટતી. ક્યારેક શક ના જાય તે માટે ચોરેલી માલમતા પરિવારના અન્ય સભ્યોને આપીને પોતે નિત્યક્રમ મુજબ કામ કરતી રહેતી.

પોલીસે જણાવ્યું કે બેઉ જણી મોંઘીદાટ હોટેલોમાં રોકાવાની, ફ્લાઈટોમાં ઉડવાની અને હરવા ફરવાની શોખીન છે.   ચોરેલી માલમતા નેપાળમાં વેચી મરાતી. તેમાંથી ઉપજતાં પૈસાથી સલિના તેના બૉયફ્રેન્ડ પ્રિન્સ ઊર્ફે ભીમબીર સાહી અને રવિના તેના પતિ બિરેન્દ્ર ઊર્ફે વિવેક સાહી સાથે મોજમજા માણતી. બીજા શહેરમાં જ્યાં સુધી ઘરકામ ના મળે ત્યાં સુધી બેઉ જણી શહેરની સારી હોટેલમાં મોંઘુદાટ ભાડું ખર્ચીને રોકાતી. ચોરીના ગુનાઓમાં સલિના અને તેના બોયફ્રેન્ડ પ્રિન્સ, રવિના અને તેના પતિ બિરેન્દ્ર તથા તેના ભાઈ ભીમબહાદુરની પણ સંડોવણી સ્પષ્ટ થઈ છે.

આ ટોળકી સામે છેલ્લાં ત્રણ વર્ષ દરમિયાન આદિપુર ઉપરાંત મહારાષ્ટ્રના પૂણે જિલ્લામાં ત્રણ, થાણે તથા બેંગ્લૉર સીટીમાં ઘરફોડ ચોરીના એક-એક મળીને નોંધાયેલાં ૬ ગુનાનો ભેદ પોલીસે ઉકેલ્યો છે. તમામ ગુનાઓમાં તેમણે એક કરોડથી વધુની માલમતા ચોરી હોવાનું ફરિયાદો પરથી સ્પષ્ટ થયું છે. જો કે, બેઉ જણીએ મોટાભાગનો માલ મોજશોખમાં ઉડાવી દીધો છે. હાલ તેમની પાસેથી પોલીસે ૫૫ હજાર રોકડાં રૂપિયા, ૧.૨૦ લાખની સોનાની ડાયમંડ રીંગ, મોબાઈલ ફોન વગેરે મળી ૧.૮૫ લાખનો મુદ્દામાલ રિકવર કર્યો છે.