મોખાણા ગામના સર્વે નંબર ૧૩૨નું ૭ એકર ખેતર, સર્વે નંબર ૨૭૭નું ૧૧ એકર ખેતર અને સર્વે નંબર ૫૯૪/૧નું ૬ એકર ખેતરના માલિક તરીકે ધરમશી કલ્યાણ શાહનું નામ બોલે છે. પરંતુ વર્ષોથી ધરમશીભાઈનો કોઈ અતોપત્તો નથી અને ખેતરો વર્ષોથી ગણોતિયાઓના કબજા ભોગવટામાં છે. મૂળ માલિકનો અતોપત્તો ના હોવાનું જાણતાં આરોપીઓએ એકસંપ થઈને બોગસ માણસને ધરમશીભાઈ તરીકે ઊભો કરીને બોગસ આધાર દસ્તાવેજો પર ૨૦૨૩માં આ ત્રણે ખેતરો પાણીના મૂલે વિવિધ વ્યક્તિઓને ચોપડાં પર વેચી મારેલી.

કૌભાંડ અંગે ૯ ફેબ્રુઆરી ૨૦૨૫ના રોજ પધ્ધર પોલીસ મથકે ધરમશી શાહ, દસ્તાવેજમાં ઓળખાણ આપનાર સાક્ષી બનનાર કંકુબેન વાલજી શાહ અને કરસન વાઘા ડોઢિયા સામે પધ્ધર પોલીસ મથકે ફોર્જરી, ચીટીંગ સહિતની કલમો તળે ગુનો દાખલ થયેલો. જેમાં ધ્રંગના વિપુલ ભગુભાઈ કોવાડીયા (આહીર), હરદેવસિંહ ભગુભા વાઘેલા, વિજય ઊર્ફે વીજેશ કરસન ઢીલા, અજય રસિકલાલ ઠક્કર, મહેશ વાલજી બાળા (આહીર), હરદેવસિંહ વગેરેની સંડોવણી સ્પષ્ટ થતાં ધરપકડ થયેલી. વિપુલ કોવાડીયા અને હરજી માવજીભાઈ કેરાસિયાએ જ સમગ્ર કાવતરું રચીને અન્ય આરોપીઓની મદદથી કૌભાંડ આચર્યું હોવાનું સ્પષ્ટ થયેલું.

આરોપીઓને શોધી લેવા પોલીસ સઘન પ્રયાસો કરી રહી છે. ઉલ્લેખનીય છે કે આ ગુનામાં જેલમાં રહેલાં એક આરોપીને બાદ કરતાં મોટાભાગના આરોપીઓની નિયમિત જામીન અરજીઓ કૉર્ટો રદ્દ કરી ચૂકી છે.