પૂર્વ કચ્છ લોકલ ક્રાઈમ બ્રાન્ચે બાડમેરથી કમળારામ મીરારામ ભીલ નામના ૪૨ વર્ષના શખ્સની ધરપકડ કરી છે.

પોલીસે આપેલી માહિતી મુજબ ૧૫-૧૨-૨૦૦૩ના રોજ ભચાઉના કુંજીસર પાસે બાતમીના આધારે ભચાઉ પોલીસ અને સ્ટ્રાઈકીંગ ફોર્સની ટૂકડી દારૂ ભરીને આવી રહેલી એક મહિન્દ્ર પીક અપની વૉચમાં ઉભી હતી. જેવી ગાડી આવી કે પોલીસ કર્મચારીઓએ તેને અટકાવવા પ્રયાસ કરેલો પરંતુ બૂટલેગરોએ પોલીસ ટીમ પર જ ગાડી ચઢાવી દીધી હતી. જેમાં બે પોલીસ કર્મચારીના મૃત્યુ નીપજ્યાં હતા અને એક જણ ગંભીર રીતે ઘવાયો હતો.

ગુનામાં કમળારામનું પણ નામ ખૂલ્યું હતું પરંતુ આજ દિન સુધી તે ઝડપાયો નહોતો. જો કે, હવે બે દાયકા બાદ પૂર્વ કચ્છ લોકલ ક્રાઈમ બ્રાન્ચે તેની ધરપકડ કરી છે. આ કાર્યવાહીમાં એલસીબી પીઆઈ એન.એન. ચુડાસમા અને પીએસઆઈ ડી.જી. પટેલ સહિતનો સ્ટાફ જોડાયો હતો.