હું દુકાને હાજર હતો ત્યારે યસ બેન્કનું એક કૂરિયર આવેલું જેમાં નવા બેન્ક ખાતાંને લગતી કીટ હતી. મને શંકા છે કે મારી દુકાનના નામે બોગસ એકાઉન્ટ ખોલાવીને સાયબર ફ્રોડ આચરાયું હોય’

૨૦ જાન્યુઆરીના રોજ ગાંધીધામના સાયબર ક્રાઈમ પોલીસ સ્ટેશનને આ અરજી મળતાં જ પોલીસ ચોંકી ઊઠી. અરજદારે સાહિલ શર્માની પૂછપરછ કરી તો તેણે જણાવ્યું કે મેં મારા એક મિત્ર યશ મુલચંદભાઈ ભાટીયા (રહે. આદિપુર)ને ભાડૂઆતને બતાડવા માટે દુકાનની ચાવી આપેલી. તેમાં કોઈક કંપનીવાળાએ ઑફિસ ચાલું કરેલી.

પોલીસે સમગ્ર કેસમાં ઝીણવટભરી તપાસ હાથ ધરતાં ગુજરાતના વધુ એક મોટા સાયબર ફ્રોડનો પર્દાફાશ થયો છે.

તપાસમાં બહાર આવ્યું છે કે આ એક એવું સાયબર ફ્રોડ છે કે જેમાં વિવિધ ગરીબ માણસોને વિશ્વાસમાં લઈ, તેમના નામ અને દસ્તાવેજોના આધારે તેમને કંપનીઓના પ્રોપરાઈટર (માલિક) દર્શાવી ૮૧ બેન્ક ખાતાં ખોલાવી દેશભરના વિવિધ બેન્ક એકાઉન્ટમાંથી ૧૮૨ કરોડ ૩૭ લાખ ૬૮ હજાર ૮૬૨ રૂપિયા જમા કરાવાયાં હતા. જેમાંથી યશ ભાટીયાએ પાંચ લાખ રૂપિયા ઉપાડ્યાં હતા. જે ૮૧ બેન્ક ખાતાં ખોલાવાયાં હતા તેમાંથી ૭૪ બેન્ક ખાતાં પર જુદાં જુદાં રાજ્યોમાં સાયબર ફ્રોડની ફરિયાદો દાખલ થઈ હોવાનું સમન્વય પોર્ટલ પરથી ઘટસ્ફોટ થયો છે.

સાયબર પોલીસે આ કૌભાંડમાં સૂત્રધાર યશ ભાટીયા અને ગાંધીધામના ટેક્સ કન્સલ્ટન્ટ ચાર્ટર્ડ એકાઉન્ટન્ટ અલ્પેશ સુરેશભાઈ લુહાર સહિત કુલ આઠ લોકો સામે વિવિધ કલમો તળે ગુનો દાખલ કર્યો છે. પોલીસે જણાવ્યું કે રાપર, આડેસર, માધાપર, ગાંધીધામ સહિતના વિવિધ શહેરો, તાલુકા, ગામોના ગરીબ, જરૂરતમંદો, ઓછું ભણેલાં લોકોને વિશ્વાસમાં લઈ તેમના નામે સાહિલ શર્મા જેવા બ્રોકરો મારફતે હંગામી ધોરણે દુકાનો ભાડે રખાતી. ભાડાની દુકાનોના આધારે યશ ભાટીયાના કહેવાથી અલ્પેશ લુહાર ઉદ્યમ પોર્ટલ પર ખોટી વેપારી અને ઉદ્યોગ પેઢીઓનું રજિસ્ટ્રેશન કરાવતો. તેના આધારે વિજય રાણા નામના શખ્સ મારફતે વિવિધ ખાનગી બેન્કોમાં એકાઉન્ટ ઓપન કરાવાતાં.

સિધ્ધાર્થ સુનીલભાઈ સોની (ગાંધીધામ), ઈલુભા મંગરુભા જાડેજા (રાપર), વિશ્વરાજસિંહ ઊર્ફે વિસુભા બાલુભા જાડેજા (મોટી રવ, રાપર), હાર્દિક હરેશભાઈ રાજગોર (સણવા, રાપર)એ ગરીબ માણસોને વિશ્વાસમાં લઈને તેમના નામના દસ્તાવેજો મેળવી તે સાહિલ શર્માને મોકલી આપેલાં.

આરોપીઓ એજન્ટ તરીકે વર્તીને આ બેન્ક ખાતાં દેશભરમાં સાયબર ફ્રોડ કરતી ગેંગોને ભાડે આપતાં. આરોપીઓને ખાતાંદીઠ જુદી જુદી રકમનું કમિશન મળતું. સાયબર પોલીસ સ્ટેશનના પીઆઈ ડી.જી. પટેલે સમગ્ર કૌભાંડની ગહન તપાસ હાથ ધરી છે. સૂત્રોના જણાવ્યા મુજબ આઠમાંથી ચારેક આરોપીઓ પોલીસના હાથવેંતમાં છે.