ગાંધીધામના વોર્ડ ૭-ડીમાં રહેતા ૫૬ વર્ષિય દિનેશ ભાણજીભાઈ પટેલ ટીમ્બરના વેપારી છે. ગઈકાલે બપોરે ફરિયાદી તેમના બે પુત્રો જોડે ઑફિસે ગયેલાં તે સમયે પોણા બારના અરસામાં કોઈ અજાણ્યો બાવો તેમના ઘરે આવેલો.

બાવાએ ગીતાબેનને વિશ્વાસમાં લેવા માટે ફોન પર તેના ગુરુ જોડે વાત કરાવેલી અને ગુરુએ પણ આ વિધિ બાદ શરીરમાં નડતર દૂર થઈ જશે તેવી ખાતરી આપેલી. ત્યારબાદ અજાણ્યા બાવાએ પાણી ભરેલો ગ્લાસ મગાવેલો. પાણી ભરેલાં ગ્લાસ પર મંત્ર ફૂંકીને તે પાણી ગીતાબેન પર તથા આસપાસમાં છાંટ્યું હતું.

‘તમારા ઘરમાં ખોટાં સમયે સોનાના દાગીના આવી ગયાં છે અને તેનું શુધ્ધિકરણ કરવું પડશે’ કહીને ઘરમાં પડેલાં તમામ ઘરેણાં માટલાંમાં લઈ આવવા જણાવેલું. અજાણ્યા બાવાની વાતોથી ભોળવાઈને અથવા વશીકરણથી હોશ ગૂમાવી ચૂકેલાં ગીતાબેને ઘરમાં જઈ લૉકરમાં રહેલાં તમામ દર-દાગીના માટલાંમાં ભરીને બાવાને આપી દીધાં હતાં. બાવાએ તેના પર વિધિ કરેલી. બાવાએ તેમને ઘરમાંથી ગંગાજળ લઈ આવવા જણાવેલું.

અજાણ્યો બાવો અંદાજે ચાળીસ વર્ષની વયનો હતો અને હિન્દી ગુજરાતીમાં બોલતો હતો.બનાવ સમયે ઘરે ગીતાબેનના સાસુ સસરાં અને પુત્રવધૂ પણ હાજર હતાં. પરંતુ, સૌ પોત-પોતાના કામમાં વ્યસ્ત હતાં અને સમગ્ર ઘટના અંગે અજાણ રહ્યાં હતા તેવું ફરિયાદમાં લખાવાયું છે.