આરોપી લાલાભાઈ દાનાભાઈ ભરવાડ (રહે. કાનમેર, રાપર) ૩૦ ઑગસ્ટના રોજ કંડલાથી ૪૨ ટન ડિગમ સોયાબીન તેલ ટેન્કરમાં ભરીને છત્રાલ જવા નીકળેલો. બીજા દિવસે પરોઢે સાડા ચાર વાગ્યે માળિયા નજીક વરસાદી નાળામાં ટેન્કર પલટી ખાઈ ગયેલું. ટ્રાન્સપોર્ટરે સ્થળ પર દોડી જઈ તપાસ કરતાં ટેન્કરમાંથી રહ્યુંસહ્યું ૧૩.૭૧ ટન તેલ મળી આવેલું અને બાકીનો જથ્થો ઢોળાઈ ગયો હતો.

જીપીએસના આધારે ચેક કરતા જણાયેલું કે ડ્રાઈવર કંડલાથી ટેન્કર લઈને નીકળ્યો ત્યારબાદ વરસાણા રામદેવ પીર મંદિર પાસે મહાદેવ ઢાબા પાછળ એક કલાક સુધી ટેન્કર સાથે રોકાયો હતો.

ડ્રાઈવરે પાર્સલ લેવા રોકાયો હોવાનો કરેલો ખુલાસો શંકાસ્પદ જણાયો હતો. એટલું જ નહીં, જ્યારે ટેન્કર પલટી મારી ગયું ત્યારે તેની સ્પીડ કલાકના આઠથી દસ કિલોમીટરની હતી. ટેન્કરનો આગળનો કાચ અકબંધ હાલતમાં હતો. ટ્રાન્સપોર્ટર સુનીલ ધનજી ડાંગરે નોંધાવેલી ફરિયાદના આધારે પોલીસે તપાસ હાથ ધરી છે.