કલેક્ટર કચેરીની મહેસુલ શાખામાં ભૂતકાળમાં ક્લાર્ક તરીકે ફરજ બજાવી ગયેલા એ.બી. કરેણ વિરુધ્ધ માપણી વધારા મામલે કલેક્ટરના ચીટનીસનો ખોટો પત્ર બનાવી, માપણી વધારો નિયમિત કરતો કલેક્ટરની ખોટી સહીવાળો  બોગસ હુકમ જારી કરીને કૌભાંડ આચર્યું હોવાનો મામલો બહાર આવ્યો છે. ભુજ ગ્રામ્યના મામલતદાર અરુણ શર્માએ કરેણ વિરુધ્ધ ભુજ એ ડિવિઝન પોલીસ મથકે પોતાના હોદ્દાનો દુરુપયોગ કરીને ઠગાઈના હેતુ બોગસ દસ્તાવેજો બનાવવા સબબના આરોપ હેઠળ ફરિયાદ નોંધાવી છે.

ભુજની ભાગોળે હરિપર પાસે સરદાર પટેલનગરમાં રહેતા લક્ષ્મણભાઈ વિશ્રામભાઈ રાઘવાણીએ ફેબ્રુઆરી માસમાં ભુજના રતિયા ગામે સર્વે નંબર ૨૦૬વાળી જમીનમાં બે એકર ૩૧ ગુંઠાનો માપણી વધારો નિયમિત કરી આપવાનો ૧૭ એપ્રિલના રોજ  કલેક્ટરે કરેલા લેખીત હુકમની નકલ સાથે અરજી રજૂ કરેલી. અરજી સાથે કલેક્ટર ચીટનીસનો પત્ર, બે લાખ રૂપિયા ભર્યાનું ચલણ, કલેક્ટરે માપણી વધારા અંગે કરેલા આખરી હુકમ વગેરે દસ્તાવેજો જોડેલાં.

હકીકતે આ ફાઈલ ચીટનીસ પાસે આવી જ નહોતી. ઉલ્લેખનીય છે કે થોડાં દિવસો અગાઉ અંજાર મામલતદારે પણ સિનુગ્રાના એક જમીન માલિક વિરુધ્ધ માપણી વધારા અંગેના ચીટનીસના બોગસ પત્રને રજૂ કર્યો હોવાની ફરિયાદ દાખલ થયેલી. આ કાંડમાં પણ કરેણની સંડોવણી હોવાની શંકા સેવાય છે.

અબડાસાના જખૌ ગામે આવેલી જમીન મૃત માલિકને ચોપડા પર જીવિત દર્શાવીને બારોબાર હડપ કરી જવાઈ હોવાનો બનાવ બહાર આવ્યો છે. વર્ષોથી સિંગાપોર સ્થાયી થયેલાં ૭૭ વર્ષિય મહેશ શાંતિલાલ મોઢ (મહેતા)એ જખૌ પોલીસ મથકે નોંધાવેલી ફરિયાદમાં જણાવ્યું છે કે તેમના પિતા શાંતિલાલ પરસોત્તમ મોઢ જખૌમાં સર્વે નંબર ૫૫થી ખેતર ધરાવતા હતા. વર્ષોથી તેમના પિતા ભાઈ ભાડુંઓ સહિત સિંગાપોર સ્થાયી થઈ ગયેલાં.

તપાસ કરતા સ્પષ્ટ થયેલું કે જખૌમાં રહેતા પદમશી ઉકેડા નામના શખ્સને શાંતિલાલ તરીકે મામલતદાર કચેરીમાં રજૂ કરાઈને, તેના ફોટો તથા અંગુઠાના બોગસ નિશાનના આધારે આ જમીન ૩૦-૦૪-૨૦૧૫ના રોજ મુંબઈ રહેતા ધરમશી બચુ ભાનુશાલીએ ખરીદી લીધી હોવાની નોંધ પડેલી. આ વેચાણ દસ્તાવેજમાં મુંબઈના કિશોર લક્ષ્મીદાસ ભાનુશાલી અને કાન્તિલાલ ભચુભાઈ ભાનુશાલીએ સાક્ષી તરીકે હાજર રહીને સહીઓ કરેલી. જખૌ પોલીસે ફોર્જરીની ધારાઓ તળે ચારેય લોકો સામે ગુનો દાખલ કર્યો છે.

ભુજ તાલુકાના કેરા ગામે રહેતી ૭૮ વર્ષિય વાલબાઈ કાનજીભાઈ વરસાણીએ તેમની નાની બહેનના પુત્રએ કાવતરું રચીને બોગસ સોગંદનામા મારફતે વડીલોપાર્જીત જમીન હડપ કરવા પ્રયાસ કર્યો હોવાની ભુજ બી ડિવિઝન પોલીસ મથકે ફરિયાદ નોંધાવી છે. વાલબાઈએ જણાવ્યું કે તેમના પિતા નાથા ગોવિંદ કણબી ભારાપર ગામે સીમ સર્વે નંબર ૮/૧૨ અને ૧૦/૧ જમીન ધરાવતા હતા.

દરમિયાનલ ૨૦૨૨ ૨૦૨૩માં લખીબેનના પુત્ર લાલજી નારણ હિરાણીએ ભુજના નોટરી રાજેશ્વરી રાવલ પાસે જમીનના હક્કો લાલજી નારણ હિરાણીની તરફેણમાં જતા કરતા હોવાના વાલબાઈ, બહેન રતનબેન, ૨૦૧૫માં મૃત્યુ પામેલાં ભાઈ ધનજી નાથા કણબીના બોગસ સોગંદનામા તૈયાર કરાવીને મામલતદાર કચેરીમાં રજૂ કરીને નોંધ પડાવવા પ્રયાસ કરેલો. પોલીસે લાલજી વિરુધ્ધ ફોર્જરીનો ગુનો દાખલ કરી તપાસ હાથ ધરી છે.