ગાંધીધામમાં રહેતા સાહિલ માવજીભાઈ મહેશ્વરી નામના એક યુવકે સાયબર ક્રાઈમ પોલીસને કરેલી એક અરજીની ઝીણવટભરી તપાસમાં મ્યૂલ એકાઉન્ટના નેટવર્કનો પર્દાફાશ થયો છે. સાહિલે પોલીસને જણાવેલું કે તેના નામે કોટક બેન્કમાં ચાલતા એક બેન્ક ખાતામાં ૧૫ લાખ જમા થયા બાદ આ ખાતું સાયબર પોલીસે ફ્રીઝ કરાવી દીધું છે. આ ખાતું તેણે જયનીત ભરતભાઈ કન્નર (રહે. કિડાણા સોસાયટી, ગાંધીધામ)ના કહેવાથી ખોલાવેલું. ખાતું ઓપરેટ કરવા માટે જે મોબાઈલ સીમ નંબર મેળવાયો હતો તે નંબરનો જયનીત ઉપયોગ કરે છે.

૧૫ લાખ રૂપિયા કોઈ ગુનાહિત કામગીરીથી આવ્યા હોવાનું શંકા રાખીને સાહિલે રૂપિયા ઉપાડવાનો ઈન્કાર કરી દીધેલો. જેથી જયરાજસિંહે તેને રૂપિયા ઉપાડવા માટે હેરાન પરેશાન કરવાનું શરૂ કરતાં તેણે પોલીસને અરજી આપેલી.

પોલીસની તપાસમાં બહાર આવ્યું કે જયનીત કન્નરે સાહિલને આઠ હજાર રૂપિયા કમિશન આપીને તેના નામના આધાર કાર્ડ, પાન કાર્ડ, ફોટોગ્રાફના આધારે બેન્ક ખાતું ખોલાવેલું. પોલીસે જયનીતને ઉપાડીને પૂછપરછ કરતાં જયનીતે ઘટસ્ફોટ કર્યો કે કોટક બેન્કમાં સેલ્સ મેનેજર તરીકે કામ કરતો દિવ્યરાજસિંહ અનિરુધ્ધસિંહ રાણા (રહે. ગજાનંદ પાર્ક, મેઘપર બોરીચી. મૂળ રહે. સુરેન્દ્રનગર) તેનો મિત્ર છે. દિવ્યરાજે આઠ હજાર રૂપિયા કમિશન આપવાની લાલચ આપીને તેના નામનું તથા તેના સર્કલના સાહિલ જેવા અન્ય મિત્રો સહિત ૩૦થી ૪૦ લોકોના જુદી જુદી બેન્કોમાં ખાતાં ખોલાવ્યાં છે. જયનીતે ૧૨ હજાર રૂપિયામાં રાજસ્થાનના કમલેશ બિશ્નોઈ નામના શખ્સને પણ પોતાનું બેન્ક ખાતું ભાડે આપેલું.

પોલીસે દિવ્યરાજસિંહને પકડીને પૂછપરછ કરી તો બહાર આવ્યું કે તેની સાથે જયરાજસિંહ રાણા અને રાજભા ગાંડુજી વાઘેલા (રહે. વર્ધમાનનગર સોસાયટી, ગળપાદર) પણ આ રીતે વચેટિયાઓ મારફતે ભાડે બેન્ક ખાતાઓ મેળવતા હતા. ત્રણે જણને બેન્ક ખાતાદીઠ ૧૫ હજાર કમિશન મળતું. જયરાજે ચિરાગસિંહ બલવંતસિંહ ઝાલા (રવેચીનગર-2, અંતરજાળ) અને શબ્બિર અકબર લુહાર (રહે. મોમાયનગર, અંતરજાળ) મારફતે  વ્યક્તિગત પેઢી અને વેપારી પેઢીના નામે કરંટ બેન્ક ખાતાં પણ ખોલાવેલાં. કરંટ બેન્ક ખાતા બદલ તેમને વીસથી પચાસ હજાર સુધીનું કમિશન મળતું.

મ્યૂલ એકાઉન્ટ્સની મલ્ટિલેવલ ચેનલનો રેલો પહોંચ્યો ગાંધીધામના કનૈયાલાલ ઠક્કર ઊર્ફે કિંગ ડેવિડ અને તેના પાર્ટનર દીપક ઠક્કર સુધી. દિવ્યરાજ, જયરાજ અને રાજભા વચેટિયાઓ મારફતે બેન્ક ખાતાઓ ખોલાવી જે કીટ મેળવે તે કીટ, સીમ કાર્ડ કૂરિયરથી મેંગ્લોર, કર્ણાટક મોકલી દેવામાં આવતા. અહીંથી આ કીટ અને સીમ કાર્ડ શ્રીલંકા મોકલાતા હતા.

કનૈયાલાલના વિદેશી વર્ચ્યુઅલ નંબરોથી બે જુદાં જુદાં વોટસએપ ગૃપ ચાલે છે. તેમાં બેન્ક ખાતાઓની કીટ, કમિશનના ટ્રાન્ઝેક્શન અંગેના હિસાબો તથા ચેટ્સ જોવા મળી છે. એક વોટસએપ ગૃપમાં સાયબર પોલીસ દ્વારા ફ્રીઝ કરાયેલાં બેન્ક ખાતાઓની વિગતો છે. કનૈયાલાલ અને દીપક અંજારના વીડી પાસે આવેલા એક ફાર્મ હાઉસમાંથી મ્યૂલ એકાઉન્ટનું નેટવર્ક ઓપરેટ કરતાં હોવાનું બહાર આવ્યું છે.

પોલીસની ગહન તપાસમાં આરોપીઓએ જુદી જુદી બેન્કોમાં કુલ ૧૦૫ ખાતાં ખોલાવ્યાં હોવાનું અને તેમાં કુલ ૪૩ કરોડ ૯૩ લાખ ૮૦ હજાર ૧૧૩ રૂપિયા જમા થયાં હોવાનું બહાર આવ્યું છે. આ ૧૦૫ ખાતાં પૈકી ૯૦ બેન્ક ખાતાંઓમાં વિવિધ પ્રકારના સાયબર ફ્રોડથી રકમ જમા થઈ હોવાનું અને તે અંગેની ફરિયાદો દાખલ થઈ હોવાનું બહાર આવ્યું છે.

પોલીસે ગુનો નોંધીને દિવ્યરાજ, જયનીત કન્નર, ચિરાગ ઝાલા અને શબ્બિર લુહારની ધરપકડ કરી લીધી છે. જયરાજ, રાજભા, કનૈયાલાલ ઠક્કર અને દીપક ઠક્કર હજુ હાથ લાગ્યા નથી. રેન્જ આઈજી ચિરાગ કોરડીયા અને એસપી સાગર બાગમારના માર્ગદર્શનમાં સાયબર ક્રાઈમ પોલીસ સ્ટેશનના પીઆઈ ભાનુશંકર વી. બોરીસાગર, પીએસઆઈ એચ.બી. કોવાડિયાએ ‘ઓપરેશન મ્યૂલ હંટ 2.0’ હેઠળ સમગ્ર નેટવર્કનો પર્દાફાશ કર્યો છે. તપાસનો રેલો હજુ અન્ય અનેક લોકો સુધી લંબાય તેવી શક્યતા છે.