લોકલ ક્રાઈમ બ્રાન્ચે ૯.૫૩ લાખનો દારૂ લઈ આવનાર ટ્રેલર ડ્રાઈવર હનુમાનરામ જાંગુ (જાટ)ને પૂછ્યું તો તેણે જણાવ્યું કે ૧૯ મેના રોજ ફલોદીમાં શંભુસિંહ હરિસિંહ રાઠોડ (રાજપૂત)એ ટ્રેલરમાં શરાબ ભરાવી આપીને કચ્છમાં પહોંચતો કરવા જણાવેલું. પરંતુ, ૨૧ મેની સવારે શંભુસિંહને લાકડીયા પોલીસે ૪૯ હજારના બિયરના જથ્થા સાથે ઝડપી પાડેલો. શંભુએ એક માસથી લાકડીયામાં ગુરુકૃપા હોટેલ ભાડા પર ચલાવવા લીધેલી. લાકડીયાના બૂટલેગર શેરમામદ રાઉમાના કહેવાથી તે એક ટ્રેલરના ટૂલ બોક્સમાં બિયરના ટીન છૂપાવીને હોટેલ પર લઈ આવેલો પરંતુ શંભુ અને ટ્રેલર ડ્રાઈવર પકડાઈ ગયેલાં.

શંભુ પકડાઈ જતા ડ્રાઈવર હનુમાન ટ્રેલર લઈને સાંચોર જતો રહેલો. ત્યારબાદ તેણે તેના મિત્ર હરિરામ કુલડીયા (જાટ)ને આ અંગે વાત કરેલી. ટ્રેલરમાં રહેલો દારૂ કચ્છમાં ખાલી કરાવવા અને પોલીસનું ધ્યાન રાખવા માટે હરિરામ તેના બે મિત્રો રવિન્દ્રસિંહ કર્નોદ (રાઠોડ) અને ત્રિલોક ગોદારા સાથે ક્રેટા કારમાં ટ્રેલરનું પાયલોટીંગ કરવા સાથે આવ્યો હતો. આ કામગીરી બદલ ત્રણે જણને ૧૦ હજાર રૂપિયા મળવાના હતા.

લોકલ ક્રાઈમ બ્રાન્ચે દાખલ કરેલી ફરિયાદ પરથી સવાલ એ ઊભો થાય છે કે દારૂનો આ જથ્થો કચ્છમાં કોને અને ક્યાં આપવાનો હતો? સપ્લાયર તો હાલ કસ્ટડીમાં છે! દારૂ કોણ રીસીવ કરવાનો છે તે જોયાં જાણ્યા વગર આ રીતે પાયલોટીંગ સાથે ચાર જણાં દારૂ લઈને રાજસ્થાનથી કચ્છ સુધી આવે તે વાત કોઈને હજમ ના થાય. 

ક્રેટા કાર લઈને આવેલા લોકોને દસ હજારનું મહેનતાણું કોણ ચૂકવવાનું હતું? તે અંગે પણ કશો ખુલાસો નથી! શંભુ સહિત પકડાયેલાં તમામ રાજસ્થાની યુવકો ૨૦થી ૨૬ વર્ષના છોકરડાં છે. માલ મોકલનાર અને રીસીવર વાસ્તવમાં મોટા ગજાના બૂટલેગરો હોવાની અટકળો છે.