SMCના PSI કે.ડી. રવિયાએ જણાવ્યું કે ભીમાસરમાં રહેતો હરદેવસિંહ દિલુભા જાડેજા તેના ભાઈ રામદેવસિંહ સાથે મળીને ઈંગ્લિશનો મોટાપાયે ધંધો કરતો હોવાની બાતમી મળેલી. દારૂ બિયરનો મોટો જથ્થો નજીકના ખંડેર જેવા મકાન અને શટરવાળી દુકાનમાં રાખ્યો હોવાની પાક્કી બાતમી મળેલી.

રામદેવને દારૂનો જથ્થો ક્યાં રાખ્યો છે તેમ પૂછતાં તે પોલીસને પિતરાઈ ભાઈ પૃથ્વીરાજસિંહ (રહે. આધોઈ, ભચાઉ)ની માલિકીના ખંડેર જેવા રહેણાક મકાન અને દુકાને લઈ ગયેલો.

SMCએ રામદેવની પ્રાથમિક પૂછપરછ કરતાં તેણે કબૂલ્યું હતું કે મુંબઈ રહેતો મૂળ વાગડનો જ એક પટેલ શખ્સ ઠેકા પરથી દારૂ લઈને તેમને મોકલાવે છે. આ બધો કારોબાર હરદેવ સંભાળે છે. પોતે કેવળ ગ્રાહકોને છૂટકમાં માલ વેચે છે. પૃથ્વીરાજ તેમનો પિતરાઈ ભાઈ છે, તેનું મકાન અને દુકાન નજીવા ભાડે રાખીને તેમાં માલ સંઘરતા હતા.

રામદેવ સામે ગાંધીધામ બી ડિવિઝન, આડેસર અને બનાસકાંઠાના ભીલડી સહિતના પોલીસ સ્ટેશનોમાં દારૂબંધીને લગતાં પાંચ ગુના જ્યારે હરદેવ સામે આડેસર પોલીસ મથકે દારૂબંધીને લગતાં ચાર ગુના નોંધાયેલાં છે.

બંને ભાઈ લાંબા સમયથી બિન્ધાસ્ત રીતે દારૂનો ધંધો કરતાં હોવા છતાં સ્થાનિક પોલીસને કશી ખબર નહોતી! SMCની રેઈડના પગલે પૂર્વ કચ્છ એસપીએ આડેસરના પીઆઈ જે.બી. આચાર્યની પોલીસ હેડ ક્વાર્ટર ખાતે લીવ રિઝર્વમાં અને LCB પીઆઈ જે.એમ. વાળાની ગાંધીધામ બી ડિવિઝનમાં બદલી કરી દીધી છે.