ગાંધીધામના ગુરુકુળમાં રહેતા ૭૬ વર્ષિય કાન્તિભાઈ દેવજીભાઈ ચૌહાણે પોલીસને જણાવ્યું કે ઘરે આવતા છાપામાંથી એક પેમ્ફ્લેટ નીકળેલું. જેમાં ‘ચાલો હરિદ્વાર, ફ્રી સેવા’ના મથાળા નીચે એવી વિગતો લખેલી કે હરિદ્વારમાં ૨૪ મેથી શ્રીમદ ભાગવત સપ્તાહનો પ્રારંભ થવાનો છે. ૩૦મી સુધી ચાલનારી આ કથામાં આવનાર લોકોને લાવવા-લઈ જવા તથા રહેવા જમવા સહિતની મફત સુવિધાઓ મળશે. એટલું જ નહીં, દરરોજ કથામાં હાજર રહેનાર વ્યક્તિને રોજ બંધ કવરમાં ૭૦૧ રૂપિયા લેખે સાત દિવસના કુલ ૪૯૦૭ રૂપિયા મળશે.

અધિક માસમાં મફતમાં હરિદ્વારની યાત્રા સાથે કથાશ્રવણનો લાભ લેવા કાન્તિભાઈ અને તેમનો મિત્ર મણિલાલ વાઢેર બેઉ જણે બીજી મેના રોજ આપેલા સરનામે રૂબરૂ જઈને પાંચ પાંચ હજાર રૂપિયા ભરીને બુકિંગ કરાવ્યું હતું. એક વૃધ્ધ વયનો વ્યક્તિ ફોર્મ ભરી નાણાં મેળવ્યાની પહોંચ આપતો હતો અને કેતન પરમાર નામનો યુવક નાણાં લેતો હતો. કાન્તિભાઈ અને મણિલાલની જેમ અન્ય ઘણાં સ્ત્રી પુરુષો પણ ત્યાં બુકિંગ કરાવવા આવેલા હતા.

બુકિંગ કરાવ્યાના થોડાંક દિવસો બાદ ૮ મેના રોજ ફરિયાદીના મિત્ર મણિલાલે પાલનપુરમાં આ જ રીતે હરિદ્વારા યાત્રાના નામે દોઢસો જેટલા વડીલો સાથે છેતરપિંડી થઈ હોવાના સમાચાર છાપામાં વાંચ્યા હોવાનું જણાવતાં બેઉ જણ ઑફિસે રૂબરૂ ગયેલાં. પરંતુ, ઑફિસ બંધ જોવા મળેલી. મોબાઈલ નંબર લગાડતાં તમામ નંબરો સ્વિચ ઑફ્ફ હતા. આજે યાત્રાનું પ્રસ્થાન થવાનું હોઈ ફરિયાદી સહિતના અનેક વડીલો ઑફિસ પાસે પહોંચેલાં. પોતાની સાથે ઠગાઈ થઈ હોવાનું પામી ગયેલાં ૬૦ જેટલાં વડીલો આદિપુર પોલીસ મથકે ફરિયાદ નોંધાવવા પહોંચ્યા હતા.

ફરિયાદીએ પોલીસને જણાવ્યું કે બસ્સો લોકોએ યાત્રા માટે બુકીંગ કરાવ્યું હોવાનો અંદાજ છે, એટલે કે આ ટોળકીએ દસેક લાખનું ફ્રોડ કર્યો હોવાનો અંદેશો છે. આ એ જ ટોળકી છે જેણે પાલનપુરમાં પણ આ જ ઢબે ચીટીંગ કરેલું અને પાલનપુર પશ્ચિમ પોલીસ મથકે ફરિયાદ નોંધાયેલી.

પોલીસે નરેન્દ્ર સાથે અજાણ્યા વૃધ્ધ અને કેતન પરમાર સામે કાવતરું રચીને ઠગાઈ કરવાનો ગુનો નોંધ્યો છે. પીઆઈ એમ.સી. વાળાએ તપાસ હાથ ધરી છે.