બીજી તરફ, આજે ગાંધીધામ નગરપાલિકાના કોંગ્રેસના પૂર્વ વિપક્ષી નેતા સમીપ જોશી, કોંગ્રેસ કાર્યકરો અને શહેરના જાગૃત નાગરિકોએ મામલતદારને આવેદન પત્ર આપી હિંદુ સંગઠનોના કૃત્યને વખોડી કાઢી ફોજદારી પગલાં લેવા રજૂઆત કરી છે. જોશીએ આરોપ કર્યો છે કે શાળાના મહિલા પ્રિન્સિપાલ કે જે પોતે એક સાધ્વી (નન) છે તેમનું બાવડું પકડીને મોબ લિન્ચીંગ કરાયેલું અને લેખીતમાં માફી પત્ર આપવા ફરજ પડાઈ હતી.  

જોશીએ જણાવ્યું કે શાળાના પ્રાંગણમાં આ ફૂડ મેલાનું આયોજન સેન્ટ થોમસ કેથલિક ચર્ચ દ્વારા યોગ્ય પરવાનગીઓ લઈને કરવામાં આવેલું.

વિદ્યાર્થીઓને ફૂડ મેલાના પાસ શાળા દ્વારા વેચાતાં આપવામાં નથી આવ્યા તેવો પ્રિન્સિપાલે જાહેર ખુલાસો કરેલો. છતાં શાળાને બદનામ કરવા માટે કેટલાંક સસ્તી પ્રસિધ્ધિભૂખ્યાં, પોતાને વિશ્વ હિન્દુ પરિષદ, એબીવીપી અને અન્ય હિન્દુ સંગઠનોના હોદ્દેદારો કાર્યકરો તરીકે ઓળખાવનારાં અસામાજિક તત્વોએ શાળામાં ગેરકાયદે ઘૂસી જઈ, દાદાગીરી ગાળાગાળી કરીને, શાળાના લઘુમતી સમાજના મહિલા સાધ્વી પ્રિન્સિપાલનો હાથ પકડી, ડરાવી ધમકાવીને જાહેરમાં અપમાનિત કરેલાં.

આ ઘટના લોકશાહી દેશ માટે કલંકરૂપ અને શરમજનક છે.

ભારતના બંધારણે સૌને વ્યક્તિ સ્વાતંત્ર્યનો અધિકાર આપેલો છે. કોણ શું ખાય, પીવે, પહેરે, ગમે ત્યાં રહે અને ગમે તે ધંધો કરી શકે છે. આ સૌનો બંધારણીય અધિકાર છે. કોણ શું ખાશે તે આ શહેરમાં વિશ્વ હિંદુ પરિષદ નક્કી કરશે? શહેર અને જિલ્લાની કોમી એકતામાં પલીતો ચાંપનાર આવા અસામાજિક તત્વો સામે કાયદેસરની ધાક બેસાડતી સુઓમોટો ફરિયાદ દાખલ કરી ન્યાય અપાવવા જિલ્લા કલેક્ટર અને જિલ્લા શિક્ષણાધિકારીને મામલતદારને આપેલા આવેદન પત્ર મારફત રજૂઆત કરવામાં આવી છે.

જોશીએ આરોપ કર્યો છે કે અગાઉની સરકારો કરતાં ભાજપના શાસનમાં ભારત સૌથી વધુ માંસ નિકાસ કરતો દેશ બન્યો છે, જે નિકાસના પ્રસિદ્ધ આંકડાઓ પરથી પ્રસ્થાપિત થાય છે. ત્યારે, સરકાર સામે કહેવાતા હિન્દુ સંગઠનો કેમ મૌન ધારણ કરી લે છે?

આવેદન પત્ર આપવા સમયે જોશી સાથે કોંગ્રેસના નિલેશ ભાનુશાલી, અમિત ચાવડા, ઈસ્માઈલ માંજોઠી, બળદેવસિંહ ઝાલા, અમૃતા દાસગુપ્તા, ગજરાબેન, મનીષ ભાટિયા પરબત ખટાણા તેમજ શહેરના જાગૃત નાગરિકો ઉપસ્થિત રહ્યા હતાં.