બાતમીના આધારે સામખિયાળી પોલીસે આજે વહેલી પરોઢે સૂરજબારી ચેકપોસ્ટ પાસે વૉચ ગોઠવીને મોરબીથી કચ્છમાં આવી રહેલી કાળા રંગની સ્કોર્પિયો કારમાંથી ૧.૮૯ લાખનો ઈંગ્લિશ દારૂ જપ્ત કર્યો હતો. પોલીસને જોઈને કારચાલકે ગાડી ભગાવી નાસવાનો પ્રયાસ કરેલો પણ થોડેક આગળ જઈને કાર ડિવાઈડર સાથે ટકરાઈ જતાં તે કાર મૂકીને અંધારામાં નાસી ગયેલો.

કારના ચેસિસ નંબરના આધારે તપાસ કરતા કારનો અસલી નંબર GJ-06 PN-4690 હોવાનું સ્પષ્ટ થયેલું. પોલીસે કારના માલિક, ડ્રાઈવર તથા દારૂ મગાવનાર અને મોકલનાર અજાણ્યા લોકો સામે ગુનાહિત કાવતરું રચીને, નકલી નંબર પ્લેટ લગાડીને દારૂની હેરફેર કરવા સહિતની કલમો તળે ગુનો નોંધી દસ લાખની કાર અને દારૂ મળી ૧૧.૮૯ લાખનો મુદ્દામાલ કબજે કર્યો છે.

લાકડીયા પોલીસે આજે વહેલી પરોઢે શિવલખા નજીક હાઈવે પર આવેલી હોટેલ ગુરુકૃપા પાસે પાર્ક થયેલા ટ્રેલરમાંથી બિયરનું કટિંગ કરી રહેલા હોટેલ સંચાલકને રંગેહાથ ઝડપી પાડ્યો છે.

ટ્રેલરમાં ૪૨.૪૬ ટન માટી (બૉલ ક્લે) ભરેલી હતી. ઝડપાયેલા હોટેલ સંચાલક શંભુનાથ હરિસિંઘ રાજપૂત (ઉ.વ. ૨૬, મૂળ રહે. રાજસ્થાન)એ પ્રાથમિક પૂછપરછમાં જણાવ્યું કે એક માસથી ભાડે આ હોટેલ શરૂ કરી છે. દારૂનો જથ્થો લાકડીયાના ઈરફાન શેરમામદ રાઉમાને આપવા માટે મગાવ્યો હતો. પોલીસને જોઈ ટ્રેલરનો ડ્રાઈવર રોહિત ઊર્ફે મોહિત જ્યાની નાસી ગયો હતો. પોલીસે ત્રણે સામે ગુનો નોંધી ટ્રેલર, માટી, મોબાઈલ ફોન, બિયર ટીન વગેરે મળી કુલ ૨૦.૮૮ લાખનો મુદ્દામાલ કબજે કર્યો છે.