૧૨-૦૬-૨૦૨૩ના રોજ આ ત્રણે ખેતરના ભુજ સબ રજિસ્ટ્રાર કચેરીમાં ગણોતિયાઓની જાણ બહાર બારોબાર વેચાણ દસ્તાવેજ બની ગયેલાં. ગણોતિયાઓએ તંત્રને રજૂઆત કરેલી કે જમીન માલિક તરીકે ચોપડે જેનું નામ બોલે છે તે ધરમશી કલ્યાણ શાહને વર્ષોથી કોઈએ જોયાં નથી, ના તે કદી આ ખેતરોમાં આવેલાં છે. મોખાણા ગામમાં પણ ધરમશી શાહ નામનો કોઈ વ્યક્તિ વસવાટ કરતો નથી.

ધરમશીએ સર્વે નંબર ૧૩૨નું ૭ એકર ખેતર કે જેની માર્કેટ વેલ્યૂ ૧૦.૨૬ લાખ છે તે ૫.૨૦ લાખ રૂપિયામાં રાપરના મોટી હમીરપરના હરદેવસિંહ ભગુભા વાઘેલાને વેચ્યું હતું. એ જ રીતે, સર્વે નંબર ૨૭૭નું ૧૧ એકર ખેતર કે જેની માર્કેટ વેલ્યૂ ૨૨.૭૭ લાખ છે તે ખેતરનો ૧૧.૪૦ લાખ રૂપિયામાં માલા હિરાલાલ સોની (રહે. ચંદિયા, ભુજ)ના નામે વેચાણ દસ્તાવેજ લખી આપેલો. એ જ રીતે, સર્વે નંબર ૫૯૪/૧નું ૬ એકર ખેતર કે જેની માર્કેટ વેલ્યૂ ૧૦.૯૧ લાખ રૂપિયા થાય છે તેનો ૫.૫૦ લાખમાં પ્રેમજી દામજી ચાડ (રહે. સુમરાસર શેખ) અને છગનલાલ પ્રેમજી સોની (સાંયરા, નખત્રાણા)ને સંયુક્ત વેચાણ દસ્તાવેજ લખી આપેલો.

આ કૌભાંડમાં ૯ ફેબ્રુઆરી ૨૦૨૫ના રોજ પધ્ધર પોલીસ મથકે ધરમશી શાહ, કંકુબેન વાલજી શાહ અને કરસન વાઘા દોઢિયા સામે બોગસ આધારો અને દસ્તાવેજો મારફતે જમીન હડપ કરવાના પ્રયાસનો ગુનો દાખલ કરેલો. તપાસ દરમિયાન પોલીસે મહેશ વાલજી વાડા, હરદેવસિંહની ધરપકડ કરેલી. આ ગુનામાં ધ્રંગના વિપુલ ભગુભાઈ કોવાડીયા (આહીર), હરદેવસિંહ ભગુભા વાઘેલા, વિજય ઊર્ફે વીજેશ કરસન ઢીલા, અજય રસિકલાલ ઠક્કર વગેરેની સંડોવણી બહાર આવેલી.

થોડાંક સમય અગાઉ પોલીસે વિપુલ કોવાડીયાની ધરપકડ કરેલી. સરકારી વકીલ ડી.જે. ઠક્કરે કૉર્ટમાં દલીલ કરેલી કે ગુનાના કાવતરાંની શરૂઆતથી જ વિપુલ અને હરજીભાઈ માવજીભાઈ નામના બે જણ સામેલ છે. તેમણે જ સમગ્ર કાવતરું રચેલું. નકલી વેચાણ દસ્તાવેજ બનાવ્યા બાદ વિપુલે જ રોકડમાં નાણાં મેળવ્યાં હતા.

ડિસ્ટ્રીક્ટ એન્ડ સેશન્સ જજ દિલીપ મહિડાએ ગુનાને વ્હાઈટ કોલર ક્રાઈમ ગણાવી, તેની ગંભીરતા, આરોપીની સંડોવણીને ધ્યાને રાખીને અરજી ફગાવી દીધી છે.

ઉલ્લેખનીય છે કે વિપુલ વિરુધ્ધ અગાઉ માધાપરમાં પણ એક ગુનો નોંધાયેલો છે. અજય રસિકલાલ ઠક્કર કચ્છમાં અબડાસા, રાપર, અંજાર, ભુજ સહિત વિવિધ પોલીસ મથકોમાં દાખલ થયેલાં આ પ્રકારના અનેક જમીન કૌભાંડના ગુનાઓનો આરોપી છે.

મહેશ વાડા અને હરદેવસિંહની નિયમિત જામીન અરજીઓ અગાઉ કૉર્ટ ફગાવી ચૂકેલી છે. તો, નાસતાં ફરતાં રહેલા હરદેવસિંહ ભગુભા વાઘેલા અને વિજય ઊર્ફે વીજેશે હાઈકૉર્ટમાં કરેલી આગોતરા જામીન અરજી પરત ખેંચવી પડી હતી.