ફરિયાદી હિતેશે જણાવ્યું કે તેના પિતા વરસામેડીમાં સર્વે નંબર ૫૧૨/૧ અને ૫૧૨/૧/૧વાળી સ્વમાલિકીની જમીન ધરાવતા હતા. તેમના મૃત્યુ બાદ ફરિયાદી સહિતના ત્રણ ભાઈ અને બેનના નામે જમીનની વારસાઈ થયેલી.

જમીન વેચાણ અગાઉ ફરિયાદી કે અન્ય કોઈ વારસદારોએ કદી કોઈને આ જમીન વેચાણ અંગેના સાટા કરાર લખી આપ્યાં નહોતા.

જમીન વેચાણ બાદ ફરિયાદીના કાકા જયચંદ રમણિકલાલ ઊર્ફે મંગલજી રૂપારેલ, ત્રિકમભાઈ રમણિકલાલ, નરેન્દ્ર ઊર્ફે રમેશ રમણિકલાલ, નવીન રમણિકલાલે જમીન અંગે ખોટી અરજીઓ, વાંધા અરજીઓ કરવાનું શરૂ કરીને તથા જમીન ખરીદનારની બદનામી થાય તેવા સમાચારો છપાવી, વોટસએપ ગૃપોમાં વાયરલ કરાવીને, કાકાઓએ જમીન ખરીદનાર લીલાવંતીબેનના પુત્ર મેહુલ રામજીભાઈ નાકર પાસેથી પચાસ લાખ રૂપિયા પડાવેલાં. એટલું જ નહીં, વધુ દસ કરોડની માંગણી કરેલી. આ અંગે હાઈકૉર્ટે ફરિયાદ નોંધાવવા હુકમ કરતાં મેહુલ નાકરે ૩જી ફેબ્રુઆરી ૨૦૨૬ના રોજ ગાંધીધામ એ ડિવિઝન પોલીસ મથકે ચારે સામે ખંડણી સહિતની ગંભીર ધારાઓ તળે ફરિયાદ નોંધાવી હતી.

આ ફરિયાદ દાખલ થયા બાદ માર્ચ માસમાં જયચંદે ભુજના ઈશ્વર દાદલાણી સાથે મળીને કાવતરું રચીને ભુજના સ્ટેમ્પ ડ્યુટી અધિકારી સમક્ષ ઉપરોક્ત જમીન અંગે છેકછાક સાથેની સહીઓવાળા ખોટા સાટા કરારની નકલ સાથે અરજી કરેલી. જે અન્વયે ફરિયાદી હિતેશને સરકારી કચેરીમાંથી ખુલાસો પાઠવવા જાણ કરાયેલી.

કાકા જયચંદનો કોઈ હક્ક હિસ્સો ના હોવા છતાં તે રૂપિયા પડાવવા માટે લાંબા સમયથી આવા કાવાદાવા કરી રહ્યો હોવાનું ફરિયાદીએ પોલીસને જણાવ્યું છે.