નેકસ્ટ જનરેશન સ્માર્ટ કાર્ગો મુવમેન્ટ હેતુથી કરાયેલી આ સમજૂતી અંતર્ગત પ્રાયોગિક તબક્કે નેવોમો કંપની MagRAIL માટે કંડલાના વર્તમાન રેલવે ટ્રેકનો ઉપયોગ કરીને ૭૫૦ મીટરનું ફ્રેમવર્ક તૈયાર કરશે. વર્તમાન ટ્રેકમાં જ લિનિયર મોટર ટેકનોલોજીનો વિનિયોગ કરીને ઈલેક્ટ્રીક પાવર્ડ વેગનથી સ્વયંસંચાલિત કન્ટેઈનર (ફ્રેઈટ) મૂવમેન્ટ થાય તે સુવિધા વિકસાવાશે.

જેથી કાર્બન ઉત્સર્જન ઘટવા સાથે કાર્ગો મુવમેન્ટના ખર્ચમાં પણ ઘટાડો થશે તેવો આશાવાદ ડી.પી. વર્લ્ડ અને ડીપીએએ વ્યક્ત કર્યો છે. પોર્ટમાં ટૂંકા અંતરના કાર્ગો ટ્રાન્સફરમાં આ પાયલોટ પ્રોજેક્ટના ઉત્સાહજનક પરિણામ આવશે તેવી અપેક્ષા છે.

ઉલ્લેખનીય છે કે ૨૦૧૭માં પૉલેન્ડમાં શરૂ થયેલી નેવોમો કંપનીના મેગ્નેટિક રેલના પ્રોજેક્ટે આખા યુરોપમાં ભારે ઉત્સુક્તા સર્જી છે. વર્તમાન રેલવે ટ્રેકમાં જરૂરી ટેકનોલોજીના વિનિયોગ સાથે મેગ્નેટિક રેલ કલાકના ૪૦ માઈલની ગતિ પકડે ત્યાર આપોઆપ ટ્રેકથી ઊપર થઈ જાય છે (લેવિટેશન). ટ્રેક સાથેનું ઘર્ષણ (ફ્રિક્શન) નહિવત્ થઈ જતાં તેની ગતિમાં ઓર વધારો થાય છે. વિશ્વમાં પેસેન્જર સર્વિસ અને કાર્ગો સર્વિસ બંને ક્ષેત્રે મેગ્નેટિક રેલ ગેમ ચેન્જર બની રહેવાનો આશાવાદ છે.

નેકસ્ટ જનરેશનના ફ્યુચરીસ્ટીક ફ્રેઈટ ટ્રાન્સપોર્ટેશનની દિશામાં આ MoU મહત્વપૂર્ણ સાબિત થશે તેમ ડીપીએના ચેરમેન સુશિલકુમાર સિંધે જણાવ્યું હતું. સિંઘ સાથે ડીપી વર્લ્ડના સીઈઓ રીઝવાન સુમાર અને નેવોમોના સીઈઓ પ્રેઝમેકે સમજૂતિ પર હસ્તાક્ષર કર્યાં છે.