આ જમીન પરના દબાણ અંગે વન તંત્રના રેન્જ ફોરેસ્ટ ઑફિસરે કલેક્ટરની અધ્યક્ષતાવાળી સમિતિ સમક્ષ લેન્ડ ગ્રેબિંગ એક્ટ હેઠળ અરજી કર્યાને એક વર્ષથી વધુ સમય થઈ ગયો હોવા છતાં તે અંગે કલેક્ટરે કોઈ નિર્ણય નથી લીધો.

ખરેખર વન વિભાગની જમીન પર જો બોર બનાવવાની મહેસુલ વિભાગે મંજૂરી આપી હોય તો જેની પણ જવાબદારી થતી હોય તેમની સામે કાયદેસર કાર્યવાહી કરવી જોઈએ.

વન વિભાગની અરજી સંદર્ભે જંગલ ખાતાની જમીન ખુલ્લી કરવામાં આવે તેવી માગ સાથે હુંબલે કલેક્ટર સાથે મુખ્યમંત્રી ભૂપેન્દ્રભાઈ પટેલ અને મહેસુલ સચિવને લેખિત રજૂઆત કરી છે.

બીજી તરફ, કચ્છ કલેક્ટરે સાંજે એક પ્રેસ વિજ્ઞપ્તિ જારી કરીને માહિતી આપી છે કે તેમની સમિતિ સમક્ષ આવેલા ૧૫ કેસમાં તપાસ હાથ ધરાઈને અરજદારોને લેન્ડ ગ્રેબિંગ એક્ટ હેઠળ ફરિયાદ નોંધાવવા હુકમ કરાયા છે.

૧૫ કેસમાં ૩૭ લોકોએ લેન્ડ ગ્રેબિંગ કર્યું હોવાનું જણાય છે. ગેરકાયદે બળજબરીપૂર્વક દબાણો કરતા લોકો સામે લેન્ડ ગ્રેબિંગ એક્ટ તળે કડક કાર્યવાહી કરાશે તેવી તાકીદ કલેક્ટર કમ લેન્ડ ગ્રેબિંગ કમિટિના અધ્યક્ષ આનંદ પટેલે કરી છે.

સરકારી અને ખાનગી જમીનો પર ગેરકાયદે દબાણ કરતા લોકો પર કડક કાર્યવાહી કરવા હેતુ ગુજરાતમાં ૨૦૨૦થી લેન્ડ ગ્રેબિંગ એક્ટ અમલી બનાવાયો છે. અરજદાર આધાર પુરાવા સાથે કલેક્ટરની અધ્યક્ષતાવાળી સમિતિ સમક્ષ રજૂઆત કરે, ત્રણથી છ મહિનામાં સુનાવણી પૂરી થઈ જાય અને ગેરકાયદે દબાણ સ્પષ્ટ થાય તો અરજદારને દબાણકાર સામે ફોજદારી ફરિયાદ નોંધાવવા હુકમ કરાય.

નિયમ મુજબ ત્રણથી છ મહિનામાં અરજીઓની સુનાવણી તપાસ કરીને અંતિમ નિર્ણય આપી દેવાનો હોય છે. ત્યારે, જો એક વર્ષ વીતવા છતાં કોઈ નિવેડો ના આવતો હોય તો અંતે કાયદાનો હેતુ જ નિરર્થક થઈ જશે.