ફરિયાદી લાલસિંહે કહ્યું કે તે મધ્યપ્રદેશના સિવની જિલ્લાના બરઘાટ તાલુકાના આષ્ટા ગામમાં રહીને મજૂરીકામ કરે છે. સંતાનમાં ૪ દીકરી અને ૧ દીકરો છે જેમાં મીનાક્ષી ચોથા નંબરની સંતાન હતી. અગાઉ ચારે મોટી બહેન ગાંધીધામમાં જ રહીને કંડલા ફ્રી ટ્રેડ ઝોનની કંપનીમાં નોકરી કરતી હતી. મીનાક્ષીથી મોટી ત્રણે બહેનોના લગ્ન થતાં તબક્કાવાર તે વતન મધ્યપ્રદેશના સાસરિયે રહેવા આવી ગયેલી.

સોનલનગરમાં તે ત્રણ હજારના ભાડાના મકાનમાં એકલી રહેતી હતી. છેલ્લે ૧૫ ઑગસ્ટની રાત્રે તેણે પિતાને વીડિયો કૉલ કરીને વાત કરેલી. ત્યારબાદ તેનો ફોન આવ્યો નહોતો.

૧૭ ઑગસ્ટના ઘરે આવ્યાં બાદ મીનાક્ષી કોઈને દેખાઈ નહોતી. તેની જોડે ગૌરવ નામનો એક છોકરો જોવા મળેલો. ગૌરવ પોતાનો કૌટુંબિક ભાઈ હોવાનું તેણે જણાવેલું. મંગળવાર સુધી ગૌરવ સોનલનગરમાં જોવા મળેલો અને પછી ગાયબ થઈ ગયેલો.

મીનાક્ષીના રૂમ બહાર તાળું લટકતું હતું અને અંદરથી તીવ્ર વાસ મારતી હતી. પોલીસે રૂમ ખોલ્યો ત્યારે અંદર ફર્શ પર કોહવાઈ ગયેલી અને ફૂલી ગયેલી લાશ પડેલી. લાશ પર ચાદર ઓઢાડેલી હતી. ગળામાં દુપટ્ટો વીંટળાયેલો જોવા મળેલો. જામનગરમાં ફોરેન્સિક ઑટોપ્સી કરનાર તબીબોએ ગળેટૂંપો આપવાથી મૃત્યુ થયું હોવાનું પોલીસ અને પિતાને પ્રાથમિક કારણ જણાવ્યાં બાદ પિતાએ ગૌરવ સામે મર્ડરની કલમો હેઠળ ગાંધીધામ એ ડિવિઝન પોલીસ મથકે ફરિયાદ નોંધાવી છે. ગૌરવ એમપીમાં પોતાના ગામથી થોડેક દૂર આવેલાં ગામ પાસે રહેતો હોવાનું લાલસિંહે જણાવ્યું છે. પીઆઈ એમ.જે. રાઠોડ અને પીએસઆઈ વી.એચ. ઝાલાએ તપાસ હાથ ધરી છે.