સોનમના આ પગલાંથી પિતા અને ભાઈઓને ખૂબ આઘાત લાગ્યો હતો. ત્રણે જણ ગાંધીધામ છોડીને સિધ્ધપુર અને પછી નેપાળ પરત જતા રહેલાં.

સોનમ સુલતાન સાથે ગાંધીધામમાં તેની પત્ની તરીકે રહેવા માંડી હતી. થોડાંક વર્ષો બાદ સુલતાનનું પોત પ્રકાશવા માંડેલું. સુલતાન સોનમને નાની નાની વાતે મારકૂટ કરતો. ક્યારેક પિતા ભાઈઓની યાદ આવી જતી તો સોનમ પતિની જાણ બહાર નાના ભાઈ રાહુલને ફોન કરી લેતી.

સુલતાનનો ત્રાસ ઉત્તરોત્તર વધતો ગયો હતો. સુલતાન સોનમને ઢોરની જેમ માર મારતો. ૧૨ જૂલાઈના રોજ સોનમે ગાંધીધામમાં રહેતા કાકાના દીકરા સંતોષને ફોન કરી જણાવેલું કે સુલતાન તેને અવારનવાર અતિશય માર મારે છે. તે બહુ ગુસ્સાવાળો છે.

શુક્રવાર સવારે પોલીસને ગુપ્ત બાતમી મળેલી કે ભારતનગર વિસ્તારમાં રહેતી ૩૩ વર્ષની એક પરિણીત સ્ત્રીનું શંકાસ્પદ સંજોગોમાં મૃત્યુ થયું છે. પરિવાર તેની અંતિમવિધિની તૈયારી કરી રહ્યો છે. માહિતીને ગંભીરતાથી લઈને ગાંધીધામ એ ડિવિઝન પોલીસ દોડી ગયેલી.

પોલીસે સોનમની ડેડબૉડીને પોસ્ટમોર્ટમ માટે રામબાગ સરકારી હોસ્પિટલે મોકલી આપી હતી. બનાવની જાણ થતાં પિતરાઈ ભાઈ સંતોષ સુનાર રામબાગ દોડી ગયેલો. દુબઈમાં લોન્ડ્રી વર્કર તરીકે કામ કરતા સોનમના નાના ભાઈ રાહુલને ફોન કરી જાણ કરેલી કે સોનમનું મરણ થઈ ગયું છે. મેં હોસ્પિટલે જઈ તેની લાશ જોઈ તો આખા શરીરે મુઢ મારના નિશાન જોવા મળેલાં. માથા પાછળથી લોહી નીકળેલું પણ જોવા મળેલું.

બહેનના મૃત્યુની વાત જાણીને રાહુલ દુબઈથી ગાંધીધામ દોડી આવ્યો છે. રાહુલે પોલીસને જણાવ્યું કે છેલ્લે ચાર વર્ષ અગાઉ ફોન પર સોનમ જોડે વાત થયેલી. ત્યારબાદ કદી વાત થઈ નહોતી.

સુલતાને શા માટે પત્ની સોનમને ઢોર માર મારીને મોતને ઘાટ ઉતારી દીધી તે અંગે પોલીસ ઈન્સ્પેક્ટર એમ.જે. રાઠોડ ઝીણવટભરી તપાસ કરી રહ્યાં છે. આજે સાંજે ચાર વાગ્યે રામબાગથી સોનમની અંતિમયાત્રા નીકળશે તેમ કચ્છ ગોરખા સમાજે જણાવ્યું છે. આ ઘટનાએ સૌના હૃદય હચમચાવી દીધા છે.