આદિપુરના વર્ડ 6-સીમાં રહેતા ગગનપ્રીતસિંઘ ઓલક કસ્ટમ ક્લિયરન્સને લગતી કામગીરીની ફર્મ ચલાવે છે. તેઓ પત્ની અને માતા પિતા સાથે આદિપુરમાં રહે છે. કામવાળી બાઈ સલીના માલા (રહે. પીપરી, પૂણે. મૂળ રહે. નેપાળ) પણ આખો દિવસ ઘરઘાટી તરીકે ઘરમાં રહેતી હતી. ગઈકાલે ગુરુવારે ગગનભાઈ કામકાજ અર્થે મુંદરા ગયેલા ત્યારે બપોરે સવા એકના અરસામાં પત્નીએ ફોન કરેલો કે ઘરના નીચેના અને ઉપરના રૂમના કબાટના ડ્રૉઅર તૂટેલી હાલતમાં છે અને બધો સામાન વેરવિખેર પડ્યો છે. કામવાળી બાઈ સલીના લાપત્તા છે.

ઘરની મૂલ્યવાન ચીજવસ્તુ ચોરીને સલીના ગાયબ થઈ ગઈ હતી. બનાવ અંગે આજે તેમણે આદિપુર પોલીસ મથકે સલીના વિરુધ્ધ ફરિયાદ નોંધાવી છે. પીઆઈ એમ.સી. વાળાએ જણાવ્યું કે લાપત્તા સલીનાને શોધવા માટે ચોમેર તપાસ હાથ ધરી છે. સૂત્રોના જણાવ્યા મુજબ સલીના સંભવતઃ કચ્છ બહાર સરકી ગઈ છે.