દસ દિવસ અગાઉ બીજી જૂલાઈના રોજ લાકડીયા પોલીસ મથકે રોહિતગીરી પ્રભુગીરી ગોસ્વામી, હાસમ બાબુભાઈ મીર (રહે. સામખિયાળી), પરેશ દામજી ગડા (રહે. મુંબઈ) સામે શાંતિલાલ વીરજી છાડવા નામના જમીન માલિકનું બોગસ આધાર કાર્ડ બનાવીને, બોગસ માણસને શાંતિલાલ છાડવા તરીકે રજૂ કરીને લાકડીયાની રેવન્યૂ સર્વે નંબર ૩૭૬/૧ની જમીન રાજેશ ભગુભાઈને ૩૦ લાખમાં વેચાણ કરી હોવાની અને સુથી પેટે ૧૧ લાખ રોકડાં આપ્યા હોવાના સાટા કરાર કર્યાં હોવાની ફરિયાદ નોંધાઈ હતી.  જે ગુનામાં પોલીસે દામજી ખીમજી નંદુ (રહે. બોરીવલી ઈસ્ટ, મુંબઈ)ની ધરપકડ કરી છે.

જમીન કૌભાંડ અંગે લાકડીયા પોલીસ મથકે ૧૯-૧૧-૨૦૨૪ના રોજ લાકડીયાના મુકેશ જાટાવડિયાએ દાખલ કરાવેલી અન્ય એક ફરિયાદ અન્વયે પોલીસે દામજી નંદુની પત્ની હંસા, પુત્ર યશ ઊર્ફે દિપ તથા મીતેશ બિપીનભાઈ સોલંકી (મૂળ રહે. ભાવનગર, હાલ રહે. મહાલક્ષ્મી, મુંબઈ)ની પણ ધરપકડ કરી છે. આ ગુનામાં જે-તે સમયે રોહિત બાવાજી અને વિહાભાઈ ગેલાભાઈ ભરવાડ (રહે. થોરીયારી, રાપર) સહિતના અજાણ્યા શખ્સો સામે ફરિયાદ દાખલ થયેલી અને પોલીસે રોહિત તથા વિહાની ધરપકડ કરેલી.

લાકડીયા પીઆઈ જે.એમ. જાડેજાએ જણાવ્યું કે ઉપરોક્ત બંને ફરિયાદો સહિતના અન્ય જમીન કૌભાંડમાં રોહિત બાવાજી અને મુંબઈનો પરેશ ગડા સૂત્રધાર હોવાનું પૂછપરછમાં સપાટી પર તરી આવ્યું છે.

લાકડીયામાં રહેતો રોહિત વર્ષોથી મુંબઈ સ્થાયી થયાં હોય તેવા પરિવારોની માલિકીની જમીનોની તપાસ કરતો. જમીનોમાં છેલ્લાં દસ પંદર વર્ષ દરમિયાન કોઈ નવી નોંધ કે કાર્યવાહી ના થઈ હોય તે જાણીને તે પરિવાર વિશે પ્રાથમિક માહિતી મેળવતો.

મુંબઈગરા વાગડના વતનીઓની જમીન અંગે રોહિત પરેશ ગડાને માહિતી આપતો. પરેશ જમીનના મૂળ માલિકના નામે કમિશન આપીને દામજી નંદુ તથા તેની પત્ની, પુત્રને અસલ માલિક તરીકે ઊભાં કરી બોગસ આધાર કાર્ડ બનાવડાવતો. રોહિત સ્થાનિકે ‘બકરાં’ શોધતો.

સારું કમિશન મળવાની લાલચે નંદુ પરિવાર નકલી આધાર સાથે જમીનના માલિક બનીને સહીઓ કરી દેતો હતો.

વાગડમાં બારોબાર વેચસાટ કરાયેલી અનેક મુંબઈગરા જૈનોની માલિકીના જમીન કૌભાંડમાં રોહિતગીરી બાવાજી, પરેશ ગડા, રાપરનો વિહો, સામખિયાળીનો હાસમ મીર, રાજેશ નામના શખ્સોની ગેંગની સંડોવણી બહાર આવી ચૂકી છે. બીજી જૂલાઈએ દાખલ થયેલી ફરિયાદમાં સાત જણની સંડોવણી સ્પષ્ટ થઈ ચૂકી છે. આજે ત્રણ પકડાયાં છે, હજુ ચાર જણ પકડાવાના બાકી છે.