પિતાએ પોલીસને જણાવ્યું કે ૨૭-૦૭-૨૦૨૪ના રોજ મોનિકાએ ઘરેથી ભાગી જઈને દલારામ જાટ જોડે પ્રેમલગ્ન કર્યાં હતા. છેલ્લાં એકાદ માસથી દીકરીએ પિતા જોડે ફોન પર વાત કરવાનું શરુ કરેલું.

મોનિકા પિતા સમક્ષ પોતાની ભૂલ બદલ વ્યથા વ્યક્ત કરતા કહેતી હતી કે પતિ તેની પાસે પાંચ લાખ રૂપિયાના દહેજની માંગણી કર્યા કરે છે. તેને સતત મારઝૂડ કરી શારીરિક માનસિક ત્રાસ આપે છે. ગળપાદરમાં આવેલી ઓરડીમાં સતત કેદ કરી રાખે છે. જો દહેજ ના મળે તો મારી નાખવાની ધમકી આપ્યા કરે છે. દલારામની બહેન શાંતિ પણ અવારનવાર ફોન પર દહેજ મુદ્દે દબાણ કર્યા કરે છે.

આત્મહત્યાના થોડાંક કલાકો પહેલાં મોનિકા માનસિક રીતે સાવ પડી ભાંગી હતી. તેણે પિતાને ફોન કરેલો અને પોતે બાડમેર પરત આવતી હોવાનું જણાવેલું. પરંતુ, ત્યારબાદ તે કદી પાછી આવી જ નહીં. પિયરમાં પગ મૂકવાના બદલે મોતને મીઠું કરી લીધું. મોનિકાના પિતાના બયાનના આધારે ગાંધીધામ એ ડિવિઝન પોલીસે મોનિકાના પતિ દલારામ અને નણંદ શાંતિ વિરુધ્ધ ગુનો દાખલ કરીને આગળની કાર્યવાહી હાથ ધરી છે.