વરસામેડીમાં રહેતો પિન્ટુ વેદાનંદ ઊર્ફે બેદાનંદ યાદવ મૂળ બિહારનો વતની છે. ૨૦૧૯માં ગાંધીધામ એ ડિવિઝન પોલીસ મથકે તેની વિરુધ્ધ ગાંજાના વેચાણ અંગે બે ગુના અને ૨૦૨૨માં અંજાર પોલીસ મથકે એક ગુનો નોંધાયેલો. ૨૫ ફેબ્રુઆરી ૨૦૨૫ના રોજ પોલીસે પિન્ટુ યાદવને ૧૪ લાખ ૬ હજારની કિંમતના ૧૪૦ કિલો ૬૦૦ ગ્રામ ગાંજા સાથે ઝડપી પાડેલો. કાયદાની નજરે આ જથ્થો ‘કૉમર્સિયલ ક્વૉન્ટિટી’ ગણાય છે. પરિણામે, પિન્ટુ રેન્જ આઈજી ચિરાગ કોરડીયા અને એસપી સાગર બાગમારની નજરે બરોબરનો ચઢી ગયો હતો.

અસામાજિક પ્રવૃત્તિઓ કરતા આરોપીઓ સામે જેમ ‘પાસા’ હેઠળ કાર્યવાહી કરાય છે તેમ માદક દ્રવ્યોના વેચાણ, પરિવહન, સંગ્રહ સાથે સંકળાયેલાં આરોપીઓને ‘પીટ (પ્રિવેન્શન ઑફ ઈલ્લીસીટ ટ્રાફિકીંગ)’ હેઠળ જેલહવાલે ધકેલાય છે. ૨૦૨૦માં પિન્ટુ યાદવ ‘પીટ’ તળે જૂનાગઢ જેલ ધકેલાયો હતો.

જેલમાંથી બહાર આવ્યા બાદ પિન્ટુ ફરી ગાંજાનો જ ધંધો કરવા મંડી પડતો. જેથી વડા અધિકારીઓએ પિન્ટુ પર સંકજો કસવા SAFEMA (સ્મગલર એન્ડ ફોરેન એક્સચેન્જ મેનિપ્યુલેટર) Act/ NDPSA તળે સંપત્તિ સીઝ કરવા નક્કી કર્યું હતું. NDPS Actની કલમો તળે માદક દ્રવ્યોના કારોબારમાંથી આરોપીએ વસાવેલી સંપત્તિ પણ સીઝ કરવાની જોગવાઈ છે.

મુંબઈમાં આ અંગે સુનાવણી હાથ ધરાયેલી અને આરોપી પિન્ટુ યાદવને પણ તેણે વસાવેલી મિલકતો કાયદેસરના સ્ત્રોતની કમાણીમાંથી વસાવેલી હોવા અંગે જરૂરી આધાર પુરાવા રજૂ કરવાની તક અપાઈ હતી. પરંતુ, આરોપી પોતાની મિલકત કાયદેસરના સ્ત્રોતમાંથી વસાવેલી હોવાનું સાબિત કરવામાં નિષ્ફળ રહ્યો.

મિલકત જપ્તીનો હુકમ મળ્યાં બાદ SOGએ પિન્ટુ યાદવે તેની પત્ની ઉષાના નામે વરસામેડીમાં ખરીદેલું ૬૪ વારનું ૧૫ લાખનું રહેણાક મકાન, પિન્ટુના નામની રેનોલ્ટ કંપનીની ૬.૨૫ લાખની કાર અને બે દ્વિચક્રી વાહનો મળી કુલ ૨૧.૩૧ લાખની મિલકત જપ્ત કરી છે.

ગુજરાતમાં સામાન્યતઃ આ પ્રકારની કાર્યવાહી ATS અને NCB જેવી એજન્સીઓ કરે છે. છેલ્લાં ત્રણ વર્ષમાં પહેલીવાર કોઈ જિલ્લા પોલીસના યુનિટે આ કાર્યવાહી કરીને ડ્રગ્ઝના દૂષણ સામેની લડાઈમાં રહેલાં દ્રઢ સંકલ્પનો પરિચય આપ્યો છે. આઈજી, એસપીના માર્ગદર્શન હેઠળ આ સફળ કામગીરીમાં SOGના પૂર્વ પીઆઈ ડી.ડી. ઝાલા અને હાલના પીઆઈ બી.વી. બોરીસાગર સાથે SOG સ્ટાફે  કચ્છ મુંબઈ વચ્ચે ધક્કા ખાવા સાથે જરૂરી ફિલ્ડ અને પેપર વર્ક કર્યું હતું.